هۆشیار زێباری باس لە گریمانەی "هەمواری بڕیارێکی دادگای فیدڕاڵی" دەکات

ئاڤا نیوز

وەزیری پێشووتری دەرەوەی عێراق دەڵێت، سەردانی سەرۆکی ئەنجوومەنی باڵای دادوەری وڵات بۆ کوەیت مانای وایە پێدەچێت بڕیارێکی دادگای فیدڕاڵی هەمواربکرێتەوە کە ڕێککەوتنی دەریایی نێوان عێراق و کوەیتی بە نادەستووری لە قەڵەمدابوو.

وێنە گەورەکە: ساڵی 2023 دادگای فیدڕاڵی ڕێککەوتنی دەریایی خۆر عەبدوڵڵای لەنێوان کوەیت و عێراق بە نادەستووری لەقەڵەمدا، بەهۆکاری ئەوەی لە پەرلەمان دەنگی دوو لەسەر سێی پەرلەمانتارانی بەدەستنەهێناوە کە مەرجێکی دەستوورییە بۆ پەسەندکردنی ڕێککەوتنە نێودەوڵەتییەکان.

بڵاوکراوەی فەرمی: هۆشیار زێباری، وەزیری پێشووتری دەرەوەی عێراق لە پەیامێکدا کە لە هەژماری تایبەتی خۆی لە تۆڕی ئێکس بڵاویکردووەتەوە، ئاماژەی بەوەشکردووە، سەردانەکەی فائق زێدان، سەرۆکی ئەنجوومەنی باڵای دادوەری عێراق بۆ کوەیت گرنگە و کاریگەریی لەسەر هەموارکردنەوەی بڕیاری دادگای فیدڕاڵی دەبێت.

دادگاکە هەموو ڕێککەوتنە نێودەوڵەتییەکانی هەڵوەشاندووەتەوە کە حکومەتەکانی پێشوو بەڕەچاوکردنی دەستوور و یاسا و بڕیاری شەرعییەتی نێودەوڵەتی (833) واژۆیان کردووە.

باکگراوند: ڕێککەوتنی خۆر عەبدوڵڵا ساڵی 2012  لەنێوان عێراق و کوەیت واژۆکرا، بەهۆی ئەو رێککەوتنەش عێراق مافی هاوبەشی لە ڕێڕەوی ئاوی خۆر عەبدوڵڵای لەدەستدا و رووبەرێکی فراوانی ئاوی لەسەر حیسابی عێراق درایە کوەیت، ئەوکاتیش ڕێککەوتنەکە ناڕەزایی لێکەوتەوە و مالیکی کە ئەوکات سەرۆکوەزیران بوو تۆمەتبارکرا بەوەی سازشی لەسەر مافی عێراق لە ڕێڕەوی دەریایی خۆرعەبدوڵڵا کردووە.