پۆلیسی هەولێر دوای سێ ساڵ تۆمەتبارێك دەستگیر دەكات

ئاڤا نیوز

پۆلیسی هەولێر دەستگیركردنی تۆمەتبارێك ڕادەگەیەنێت كە بەر لە سێ ساڵ تاوانی كوشتنی ئەنجامداوە و هەڵاتووە.

چیرۆكی سەرەكی: سێ ساڵ پێش ئێستا، لە ئەنجامی كێشەیەكی كۆمەڵایەتی كە دەمەقاڵێ و توندوتیژی لێكەوتەوە و چەك بەكارهات، تاوانێكی كوشتن لە شاری هەولێر ئەنجامدرا و هەر ئەوكات تۆمەتبارەكە بۆ دەرەوەی شاری هەولێر و هەرێمی كوردستان هەڵاتبوو، بەدرێژایی ئەم ماوەیە پۆلیس بە وردی بەدوای تۆمەتبارەكەوە بوو و چاودێری دەكرد، دوای گەڕانەوەی بۆ شاری هەولێر، دەستبەجێ دەستگیركرا.

ڕاگەیێنراوی فەرمی: بەڕێوەبەرایەتیی پۆلیسی پارێزگای هەولێر لە ڕاگەیێنراوێكدا ئاماژەی بەوەكرد، دوای گەڕانەوەی تۆمەتبارەكە بۆ شاری هەولێر، لەزووترین كاتدا لەلایەن هێزەكانی پۆلیسەوە دەستگیركرا، لەكاتی دەستگیركردنی تۆمەتباریش، چەكی جۆری كلاشینكۆف و دەمانچەی لەلا بووە و چەكەكان دەستی بەسەردا گیرا.

لەلایەکی دیکەوە: پۆلیسی هەولێر دڵنیایی بە هاووڵاتیان دەدات كە هیچ كەس لە دەستی یاسا و پۆلیس دەربازی نابێت و تۆمەتباران لە هەر كوێ بن، بەسزای خۆیان دەگەن.