گۆڕانی كوردسات كۆنفڕانس دەبەستێت

ئاڤا نیوز

بزووتنەوەی گۆڕان، باڵی كوردسات، بە ڕاسپاردە و سەرپەرشتیی كۆمیسیۆنی باڵای سەربەخۆی هەڵبژاردنەكانی عێراق، سبەی شەممە كۆنفڕانس دەبەستێت، ئەمەش دوای ئەوەی كۆمیسیۆن كۆنفڕانسەكەی 5ـی ئەم مانگەی گۆڕانی زەرگەتەی هەڵوەشاندەوە و بەناڕاستەوخۆ وەك كۆبوونەوەیەكی حیزبی ناساند.

چیرۆکی سەرەکی: دوای ئەوەی كۆمیسیۆنی هەڵبژاردنەكانی عێراق، نووسراوێكی ئاڕاستەی باڵی كوردساتی بزووتنەوەی گۆڕان بە سەرۆكایەتی 'دانا ئەحمەد مەجید' كرد، بە ئەنجامدانی كۆنفڕانسی بزووتنەوەکە لە ڕۆژی 26ـی نیسان، گۆڕانی كوردسات بانگەوازی سەرجەم هەڵسوڕاوانی دەكات كە ناویان لە لیستی دەستەی گشتیی هەیە و مافی بەشداریكردنیان هەیە، پیادەی ئەو مافە مەدەنیەیان بكەن.

ڕاگەیێنراوی فەرمی: گۆڕانی كوردسات ڕایدەگەیەنێت، دوای هەوڵ و تەقەلایەكی زۆر و كردنەوەی گرێ یاساییەكان، پاڵپشت بە فەرمان و ڕێنماییەكانی کۆمیسیۆنی باڵای سەربەخۆی هەڵبژاردنەکانی عێراق، بڕیاردرا ‎ڕۆژی شەممە 2025-04-26، کاتژمێر 10ـی بەیانی لە (هۆڵی ئاشتی) لە شاری سلێمانی، بەسەرپەرشتی كۆمیسیۆنی باڵای سەربەخۆی هەڵبژاردنەكان و فەرمانگەی پارت و ڕێکخراوە سیاسیەکان، هاوکات ئامادەبوونی نوێنەری وەزارەتی ناوخۆی حکومەتی هەرێمی کوردستان و سەرۆکایەتی دادگای تێهەڵچوونەوەی ناوچەی سلێمانی، کۆنفڕانسی بزووتنەوەی گۆڕان دەست بەکارەکانی دەکات.

باكگراوند: 5ـی ئەم مانگە ئاڕاستەی گردەکەی بزووتنەوەی گۆران بە سەرۆکایەتیی چیا نەوشیروان مستەفا و بەبێ ئامادەبوونی نوێنەری کۆمیسیۆنی هەڵبژاردنەکانی عێراق، بەناوی گۆڕانەوە کۆنگرەی بەست و ئەندامانی جڤاتی نیشتمانی هەڵبژارد، بەڵام ڕەوتی کوردساتی حیزبەکە ڕایگەیاند، کۆمیسیۆن بڕیاری دواخستنی کۆنگرەکەی دابوو و نوێنەریش ئامادە نەبووە، بۆیە ئەوەی لە گردەکە کرا تەنیا کۆبوونەوەیەکی گشتی بووە نەک کۆنگرە.