'کۆنفڕانسی نیشتیمانیی کورد' لە ڕۆژئاوای کوردستان دەبەسترێت

ئاڤا نیوز

سبەی شەممە، هێزە سیاسییەکان ڕۆژئاوای کوردستان "کۆنفڕانسی نیشتیمانیی کورد" لە سووریا دەبەستن، نوێنەری سەرۆک بارزانی و شاندی "دەم پارتی" بەشدار دەبن لە کۆنفڕانسەکە.

چیرۆکی سەرەکی: هێزە سیاسییەکانی ڕۆژئاوای کوردستان "کۆنفڕانسی نیشتیمانی" دەبەستن کە تێیدا داواکارییەکانی کورد لە دەسەڵاتی نوێی دیمەشق و دەستووری داهاتووی وڵاتەکەدا دیاری دەکرێن، هاوکات بڕیاریشە دوای کۆنفڕانسەکە لیژنەیەکی یەکگرتوو بۆ دانوستان لەگەڵ حکومەتی سووریا بچێتە دیمەشق.

ڕاگەیێنراوی فەرمی: فەیسەل یوسف، وتەبێژی ئەنجوومەنی نیشتیمانیی کوردی (ئەنەکەسە) بە ئاڤا میدیای ڕایگەیاند: شەڕەفمەندین نوێنەری جەنابی سەرۆک بارزانی، د.حەمید دەربەندی، بەشداری کۆنفڕانسەکە دەکات، کە پاڵپشتییەکی مەعنەوی گەورە پێشکەش دەکات، وەک چۆن هەمیشە لایەنگریی یەکڕیزیی کورد بووە.

زانیاریی زیاتر: ڕۆژی 21ـی ئەم مانگە، پارتی یەکێتیی دیموکرات (پەیەدە) و ئەنجوومەنی نیشتیمانی کورد (ئەنەکەسە) ڕێککەوتن لەسەر دیاریکردنی ڕۆژی 26ـی ئەم مانگە بۆ بەڕێوەچوونی "کۆنفڕانسی نیشتیمانیی کورد" لە ڕۆژئاوای کوردستان.

ئەوەی پێویستە بیزانیت: بڕیاربوو ڕۆژی 18ـی ئەم مانگە کۆنفڕانسەکە بکرێت، بەڵام "ئەنەکەسە" تێبینیی لەسەر ناو و چۆنییەتی ئامادەکارییەکانی تایبەت بە کۆنفڕانسەکە هەبوو، بۆیە دواخرا تاوەکو ڕێککەوتن لەمبارەیەوە لەنێوان لایەنەکان کرا.