کۆنفڕانسی یەکڕیزی بڕیاری پێکهێنانی شاندێکی هاوبەشی کوردی دا

ئاڤا نیوز

کۆنفرانسی یەکڕیزیی کورد لە ڕۆژئاوای کوردستان بڕیاری پێکهێنانی شاندێکی هاوبەشی کوردی دا بۆ جێبەجێکردن و بەدیهێنانی ئەو دیدگا هاوبەشەی لە ئەنجامی کۆنفرانسەکە بەدەستهاتوون.

 

وێنە گەورەکە: ئەمڕۆ شەممە ڕێککەوتنی 26ـی 4ـی 2025، بە بەشداری پارتی یەکێتیی دیموکرات 'پەیەدە' و ئەنجوومەنی نیشتمانی کورد 'ئەنەکەسە' کۆنفرانسی نیشتمانیی کورد لە ڕۆژئاوای کوردستان دەستیپێکرد، دوای تەواوبوونی کۆنفرانسەکە ڕاگەیێنراوی کۆتایی خوێنرایەوە.

 

چی ڕوویدا: هەریەک لە محەممەد ئیسماعیل، سەرۆکی ئەنجوومەنی نیشتمانیی کورد لە سووریا 'ئەنەکەسە' و  فەواز یوسف، ئەندامی دەستەی سەرۆکایەتیی پارتی یەکێتیی دیموکرات 'پەیەدە' لە کۆنفرانسێکی ڕۆژنامەوانی هاوبەشدا ڕاگەیەنراوی دەرئەنجامی کۆتایی کۆنفرانسەکەیان خوێندەوە.

 

ڕاگەیێنراوی فەرمی: بەگوێرەی ڕاگەیێنراوەکە، کۆنفرانس بڕیاریدا لە زووترین کاتدا شاندێکی هاوبەشی کوردی پێکبهێنرێت بۆ ئەوەی ئەو دیدگا هاوبەشە بگۆڕێت بۆ واقیعی سیاسی و هاوکات لەگەڵ لایەنە پەیوەندیدارەکان لە پەیوەندیدابێت بۆ بەدیهێنانی ناوەڕۆکی دیدگاکە.