سەرکردەیەکی پارتی: هیچ مەرجێکمان لەبارەی دابەشکردنی پۆستەکان بۆ یەکێتی دانەناوە

ئاڤا نیوز

پارتی و یەکێتی دەست بە گفتوگۆ دەکەن لەبارەی دابەشکردنی پۆستەکان، ئەندامێكی مەكتەبی سیاسیی پارتیش ڕایدەگەیێنێت، حیزبەکەی هیچ مەرجێكی پیشوەختەی لەبارەی دابەشکردنی پۆستەکان دانەناوە، لەگەڵ یەکێتیش قۆناغی باشیان بڕیوە.

وێنە گەورەکە: دوای نووسینەوەی ستراتیژیەت و كارنامەی كابینەی 10ی حکومەت لە ماوەی ڕابردوودا،  بڕیارە شاندی دانوستانکاری هەردوولا ڕۆژی یەکشەممە 26-4-2025 جارێکی دیکە لەبارەی پێکهێنانی حکومەت کۆببنەوە و دەست بە گفتوگۆ بکەن لەبارەی دابەشکردنی پۆستەکان.

زانیاریی تایبەت: بەپێی زانیارییەكانی ئاڤا کۆبوونەوەکە لە سلێمانی دەبێت و تەواوکەری كۆبوونەوەكەی 17ی ئەم مانگە دەبێت، كە هەردوو لیژنەی باڵا و تەكنیكی شاندی دانوستانكاری هەردوولا بەشدار بوو.

لێدوانی فەرمی: زیاتر لە شەش مانگ بەسەر تێپەڕبوونی خولی شەشەمی پەرلەمانی کوردستان تێپەڕیوە، کەچی هێشتا وادەی پێکهێنانی کابینەی نوێی حکومەت دیارنییە. زاگرۆس فەتاح، ئەندامی مەكتەبی سیاسیی پارتی دیموكراتی كوردستان بە ئاڤای وت: "دواکەوتنی پێکهێنانی حکومەت کارێکی ئاساییە و لە وڵاتانی دیکەش ڕوودەدات، ئەوەی گرنگە دەبێت ڕێز لە دەنگدەرانی خۆمان بگرین و كابینەی دەیەم بەزووترین كات پێكبهێنرێت".

لەبارەی دابەشکردنی پۆستەکان کە قۆناغێکی گرنگی پێکهێنانی حکومەتە، زاگرۆس فەتاح دەڵێت: "پارتی هیچ مەرجێكی پیشوەختەی دانەناوە بۆ ئەوەی چ پۆستێك وەربگرێت یان چ پۆستێک هێڵی سوورە، لەگەڵ یەكێتیش قۆناغێكی باشی دانوستانەكانمان بڕیوە".

بەو وتەی ئەو سەرکردەیەی پارتی، حیزبەکەی لەگەڵ ئەوەیە بەپێی دەنگ و شایستەی هەڵبژاردن پۆستەكان لەنێوان پارتی و یەکێتی و لایەنەکانی دیکە دابەش بكرێن. دەشڵێت: "پارتی لە پێكهێنانی یەكەم كابینەوە تا ئێستا پلە و پۆستی بەلاوە گرنگ نەبووە، خاڵی گرنگ لای ئێمە جێبەجێکرنی ئەجێندانی نیشتمانیمانە، بە جۆرێک لەڕێگەی دەنگی دەنگدەرانەوە بتوانین حکومەتێک پێکبهێنین خزمەتی خەڵک بکات".