ئومێد خۆشناو: کارەکانی نۆژەنکردنەوەی بازاڕی قەیسەری تەواو بوون

ئاڤا نیوز

 

 دوای سوتانی نزیکەی ساڵێکە پرۆسەی نۆژەنکردنەوەی بازاڕی قەیسەری دەستیپێکردووە، پارێزگاری هەولێریش لەوبارەیەوە دەڵێت، 'کارەکان تەواوبوون و دوکانەکان ڕادەستی دوکاندارەکان کراوەتەوە'.

 

وێنە گەورەکە: شەوی 5ی ئایاری 2024، بازاڕی قەیسەری هەولێر لەلایەن باندێکەوە سوتێنرا، دوای لێکۆڵینەوەکانی ئاسایش و پۆلیس هەرێمی کوردستان بە هاوبەشی لەگەڵ لیژنەیەکی لێکوڵێنەوەی سەر بە حکومەتی عێراق، دەرکەوت گرووپێک دەستیان لە سوتاندنی بازاڕەکەدا هەیە و دەستگیر کران.

 

لێدوانی فەرمی: ئومێد خۆشناو، پارێزگاری هەولێر بە ئاڤا میدیای ڕاگەیاند: قەیسەری هەولێر لە دوو بەش پێکهاتووە، بەشی نوێ 100 دوکانە و سەرجەمیان بە دووکاندارەکان دراونەتەوە و کاری تێدا دەکەن.

 

-    بەشە کۆنەکەی قەیسەریش دوو نهۆمە، نهۆمی یەکەم 100 دووکانە، 40 دووکانیان کاریان تێدا دەکرێت، ئەوانی دیکەش دووکاندارەکان خەریکی دروستکردنی دیکۆرن بەدڵی خۆیان، بەڵام نهۆمی دووەم 43 دووکانە و کارەکانیان تەواو کراوە، بەنیازین کۆبوونەوەیەک لەمبارەیەوە بکەین، بۆ ئەوەی بیکەین بە بەشێکی کولتووری.

 

زانیاریی زیاتر: تێچووی چاککردنەوە و سەرلەنوێ نوژەنکردنەوەی بازاڕی قەیسەری، پێنج ملیار و 250 ملیۆن دینارە و لەلایەن حکومەتی هەرێمی کوردستانەوە لە ئەستۆگیراوە.

 

باکگراوند: لە ڕووداوی سووتاندنی بازاڕی قەیسەریدا 200 دووکان و حەوت کۆگا سووتان.