هێنان و بردنی ئاژەڵ بۆ پارێزگای كەركووک 21 ڕۆژ قەدەغە دەکرێت

ئاڤا نیوز

 

بۆ ڕێگریکردن لە تەشەنەسەندنی نەخۆشی تای خوێنبەربوون، هێنان و بردنی ئاژەڵ بۆ نێو پارێزگای کەرکووک بۆ ماوەی 21 ڕۆژ قەدەغە دەکرێت، هاوکات ژمارەیەک بڕیار و ڕێکاری نوێ دەگیرێتەبەر.

چیرۆکی سەرەکی: بە بەشداری دامودەزگا تەندروستی و ئەمنییەکانی پارێزگای کەرکووک و دەزگا پەیوەندیدارەکانی دیکە، لە دیوانی پارێزگا کۆبوونەوەیەکی فراوان بۆ گرتنەبەری ڕێکاری پێویست بۆ ڕێگرتن لە بڵاوبوونەوەی نەخۆشی تای خوێنبەربوون، کرا، بڕیاردرا لیژنەی بەرەنگاربوونەوەی نەخۆشی تای خوێنبەربوون پێکبهێندرێت، هاوکات ژمارەیەک بڕیار دەرکران.

 

ئەوەی پێویستە بیزانیت: پارێزگای کەرکووک بووەتە زۆنی سووری بڵاوبوونەوەی نەخۆشی تای خوێنبەربوون، تا ئێستا 40 حاڵەتی گوماناوی بە تووشبوون لەو پارێزگایە تۆمارکراوە، کە هەشت حاڵەت پشتڕاست کراونەتەوە، چوار لە تووشبووانیش مردوون، سێ تووشبووش چاکبوونەتەوە و ڕەوانەی ماڵەوە کراونەتەوە و یەک تووشبوو لە نەخۆشخانە ماوە.

 

لێدوانی فەرمی: دوای کۆتاییهاتنی کۆبوونەوەکە، ڕێبوار تەها، پارێزگاری کەرکووک، بڕیارەکانی بۆ دەزگاکانی ڕاگەیاندن خوێندەوە کە ئەمانەن:

 

یەکەم: هێنان و بردنی هەمووجۆرە ئاژەڵێک بۆ پارێزگای کەرکووک بۆ ماوەی 21 ڕۆژ قەدەغەیە، واتە نە ئاژەڵ لە پارێزگاکانی دیکەوە ڕێگەی پێدەدرێت بهێنرێتە نێو کەرکووک، نە لە کەرکووکیش ڕێگە دەدرێت ئاژەڵ ڕەوانەی پارێزگاکانی دیکە بکرێت، بەڵام هێنان و بردنی ئاژەڵ لەنێوان قەزا و ناحیە و گوندەکانی پارێزگای کەرکووک، ئاساییە.

 

دووەم: سەربڕینی ئاژەڵ لەنێو شار بەهەموو شێوەیەک قەدەغەیە، ڕێکاری پێویست بەرامبەر سەرپێچیکاران دەگیرێتەبەر و ڕووبەرووی دادگا دەکرێن و بە پێبژاردن سزا دەدرێن، تاکە شوێن کە ڕێگەپێدراوە ئاژەڵی لێ سەرببڕدرێت، سەربڕخانەی گشتیی کەرکووکە.

 

سێیەم: تەندروستیی کەرکووک لە سەرجەم نەخۆشخانە و بنکە تەندروستییەکان، ڕێکاری پێویستی خۆپارێزی دەگرنەبەر بەپێی پێویستی و دەسەڵاتیان پێدراوە.