یاسای بەپارێزگابوونی هەڵەبجە ڕەوانەی سەرۆکایەتیی کۆمار کرا

ئاڤا نیوز

 

دوای پەسەندکردنی پرۆژە یاسای بەپارێزگابوونی هەڵەبجە، ئەمڕۆ یەکشەممە، پەرلەمانی عێراق یاساکەی بۆ سەرۆکایەتیی کۆمار نارد بۆ ئەوەی پەسەندی بکات و دواتر لە ڕۆژنامەی "وەقائیعی عێراق" بڵاو دەکرێتەوە و دەکەوێتە بواری جێبەجێکردن.

 

وێنە گەورەکە: دوای ناکۆکی و چەندین جار دواخستنی، ڕۆژی 14-04-2025، دواجار پەرلەمانی عێراق بە زۆرینەی دەنگ پرۆژە یاسای بە پارێزگابوونی هەڵەبجەی پەسەند کرد.

 

لێدوانی فەرمی: شاخەوان عەبدوڵڵا، جێگری سەرۆکی پەرلەمانی عێراق ڕایگەیاند،  یاسای بەپارێزگابوونی هەڵەبجە ڕەوانەی سەرۆکایەتیی کۆمار کرا بۆ پەسەندکردنی.

 

لەلایەکی دیکە: لە ساڵی 2014ـەوە حکومەتی هەرێمی کوردستان هەڵەبجەی بە فەرمی کردووە بە پارێزگا. ئێستا ژمارەی دانیشتووانی هەڵەبجە بە نزیکەی 120 هەزار کەس دەخەمڵێنرێت و لەڕووی کارگێڕیشەوە لە دوو قەزا و سێ ناحیە پێکدێت.

 

ئەوەی پێویستە بیزانیت: بەپێی نەخشەی سنووری پارێزگای هەڵەبجە کە محەممەد تەمیمی، وەزیری پلاندانانی عێراق ئیمزای لەسەر کردووە، ناحیەکانی سیروان و خورماڵ و بیارە و بەمۆ دەگرێتەوە و قەزای هەڵەبجەش ناوەندی پارێزگاکەیە.

 

خاڵە نەرێنییەکان: هەرچەندە لەلایەن حکومەتی هەرێمی کوردستانەوە کراوە بە قەزا، بەڵام هێشتا خورماڵ وەک ناحیە ناوی لە نەخشەکەی عێراقدا هاتووە.