بۆ یەکەمجار کاروباری پزیشکیی پێشمەرگە بە دیجیتاڵی دەکرێت

ئاڤا نیوز

بۆ یەکەمجار لە هەرێمی کوردستان کاروباری پزیشکیی پێشمەرگە بە دیجیتاڵی دەکرێت و ستافی پزیشکی سەرجەم یەکە سەربازییەکان لە ڕێگەی سیستەمێکەوە بە بەڕێوەبەرایەتیی کاروباری پزیشکیی گشتیی پێشمەرگە دەبەسترێنەوە.

لێدوانی فەرمی: د. ڕەزا ئیسماعیل سنیار، بەڕێوەبەری کاروباری پزیشکیی گشتیی پێشمەرگە بە ئاڤا میدیای ڕاگەیاند، سیستەمەکە شەش بواری لەخۆگرتووە و گرنگترینی بۆ بریندارانە.

بۆچی گرنگە: هەر پێشمەرگەیەک دووچاری پێکانێکی لەناکاو بێت بە هەر هۆکارێک، بە کەمتر لە دوو خولەک وردەکاری لە سیستەمەکە تۆمار دەکرێت و دەستبەجێ بڕیار لەوە دەدرێت چی پێویستە و لە چ نەخۆشخانەیەک چارەسەر بکرێت. 

خاڵێکی دیکەی گرنگی ئەم سیستمە بۆ نەخۆشی گوازراوەیە، هەر کاتێک گومان بکرێت نەخۆشی گوازراوە لە یەکەیەکی سەربازی هەیە، ڕاستەوخۆ تووشبووەکە لە سیستم تۆمار دەکرێت و ڕێکاری پێویست بۆ ڕێگریکردن لە بڵاوبوونەوەی دەگیرێتەبەر.

ئەوەی پێویستە بیزانیت: ڕۆژی دووشەممە 28-4-2025 سیستەمەکە لە سەرجەم فیرقە و لیواکان دەکەوێتە واری جێبەجێکردن. سەرجەم زانیارییەکانی پزیشکی یەکە سەربازییەکانی تۆمار دەکرێت، وەک پێداویستی لۆجستی، مەشقی پزیشکی، مەرج و ڕێنمایی تەندروستی گشتی. بۆ جێبەجێکردنیشی ڕاهێنان بە ئەفسەران و کارمەندانی پزیشکی یەکە سەربازییەکان دەکرێت.