گەورەترین تێرمیناڵ لەسەر ئاستی عێراق لە دهۆک دروست دەکرێت

ئاڤا نیوز

گەورەترین تێرمیناڵ لەسەر ئاستی هەرێمی کوردستان و عێراق لە دهۆک دروست دەکرێت و دەبێتە بنکەی هاتووچۆی نێوان کوردستان و وڵاتانی دراوسێ.

چیرۆکی سەرەکی: تێرمیناڵی نێودەوڵەتیی دهۆك لەسەر ڕووبەری 259 هەزار مەتر چوارگۆشە دروست دەکرێت، بە نوێترین شێواز و دیزاینی ئەندازیاریی سەردەمیانە دیزاین كراوە و نوێترین تەكنیكەكانی بیناسازی لەو پرۆژەیە بەكار دەهێنرێت، پڕۆژەکە لە لایەن کۆمپانیای کاڤین گرووپ جێبەجێ دەکرێت و شاری دهۆك ڕەنگینتر دەكات.

زانیاریی بەدەستهاتوو: تێرمیناڵەكە گەڕاجێكی وەستانی ئۆتۆمبێلی لەخۆگرتووە ڕووبەرەكەی زیاتر لە 72 هەزار مەتر دووجایە، لەگەڵ 63 پێشەنگای جیاجیا بە سێ قەبارەی جیاواز، بۆ كڕین و فرۆشتن و بەکرێدانی ئۆتۆمبێل.

تێرمیناڵەکە ژمارەیەك ئۆفیسی كارگێڕی و بازاڕ و كۆمەڵگەیەكی تێدایە؛ لەگەڵ چێشتخانە و كافتریای جۆراوجۆر، سەرەڕای ئەوەش ژمارەیەك سەنتەری میكانیكی بۆ چاككردنەوەی ئۆتۆمبێل و خزمەتگوزاری و شووشتنگەی ئۆتۆمبێل لەخۆدەگرێت.

دەکەوێتە کوێ؟ كەوتووەتە شوێنێكی ستراتیژی شاری دهۆك لەسەر ڕێگەی سەرەكی دهۆك - زاخۆ لە نزیک فاملی مۆڵی دهۆك، ئەوەش وا دەكات هەموو كەسێک بە ئاسانی بیدۆزێتەوە و پێی بگات.

بۆچی گرنگە؟ گەشتیار لەو تێرمیناڵەوە دەتوانێ بە ئاسانترین شێوە و هەرزانترین نرخ گەشتی هەموو پارێزگاكانی هەرێمی كوردستان و عێراق بكات، جگەلەوەش بەردەوام پاسی ڤی ئای پی و ئۆتۆمبێلی تایبەت بۆ گەشتی وڵاتانی دراوسێ؛ توركیا، ئێران، سووریا و ئوردن هەیە.