ئاستی بەرهەمهێنانی كارەبا لە وێستگەی بازیان گەیشتووەتە 1250 مێگاوات

ئاڤا نیوز

وەزیری كارەبای هەرێمی كوردستان وێستگەی بەرهەمهێنانی كارەبای بازیان بەسەردەكاتەوە، كە دوای پەرەپێدانی وێستگەكە، ئاستی بەرهەمهێنانی كارەبای گەیاندووەتە هەزار و 250 مێگاوات.

 

چیرۆكی سەرەكی: ئەمڕۆ دووشه‌ممه‌ 27ـی نیسانی 2025، لە چوارچێوەی سەردانەكەی بۆ پارێزگه‌ی سلێمانی، كەمال محەمەد، وەزیری كارەبا و شاندی یاوەری سەردانی وێستگەی بەرهەمهێنانی كارەبای بازیانی لە پارێزگه‌ی سلێمانی كرد، لەلایەن سەرۆكی جێبەجێكار و دامەزرێنەری كۆمپانیای 'تۆرەس' پێشوازی لێ كرا.

 

چی ڕوویدا: لەمیانی سەردانی وەزیری كارەبا بۆ وێستگەی كارەبای بازیان، هەنگاوەكانی بەرەوپێشچوونی وێستگەكە و پلان و بەرنامەی كۆمپانیای 'تۆرەس' دوای واژۆكردنی گرێبەستی لەگەڵ گەورە كۆمپانیای وزە 'جی ئی ڤێرنۆڤا' بۆ پەرەپێدان و پێشخستنی وێستگەكە تاوتوێ كرا.

 

لێدوانی فەرمی: كەمال محەممەد وەزیری كارەبای حكومەتی هەرێمی كوردستان، دەستخۆشی لە تیمی وێستگەكە كرد كە بەشێوەیەكی پێشكەوتوو وێڕای بەرهەمهێنانی كارەبا، پابەندی لایەنی پاراستنی ژینگەیی بوونە.

 

لەلایەكی دیكەوە: شێخ سەعد تەیب، سەرۆكی جێبەجێكار، سوپاسی پاڵپشتی و هاوكاریی وەزارەتی كارەبا و سامانە سروشتییەكانی كرد، كە ڕۆڵی گەورەیان لە بنيادنانی وێستگەكە و دابینكردنی سووتەمەنی و بەردەوامی ئیشپێكردن و فراوانكردنی وێستگەكه‌ هەبووە.

 

باكگراوند: وێستگەی بەرهەمهێنانی كارەبای بازیان لە كابینەی نۆیەمی حكومەتی هەرێمی كوردستان بونیاد نرا و لە ماوەیەكی كەمدا دەستی بە بەرهەمهێنانی كارەبا كردووە، دوای پەرەپێدانی وێستگەكە لەلایەن كۆمپانیای وزەی جی ئی ڤێرنۆڤا، ئاستی بەرهەمهێنانی كارەبای گەیشتووه‌تە 1250 مێگاوات.