تورکیا: چاوەڕوانی ئەنجامی ڕێککەوتننامەکەی ئەحمەد شەرع و مەزڵووم عەبدین

ئاڤا نیوز

 

وەزیری دەرەوەی تورکیا ڕایدەگەیەنێت لە چاوەڕوانی ئەنجامی ڕێککەوتنامەی چەند مانگی ڕابردووی نێوان سەرۆکی سووریا و فەرماندەی هێزەکانی سووریای دیموکرات دان.

وێنە گەورەکە: لە 2025-03-10، ڕێککەوتنێکی گرنگ لە نێوان ئەحمەد شەرع، سەرۆکی سووریا بۆ قۆناغی ڕاگوزەر و  مەزڵووم عەبدی، فەرماندەی هێزەکانی سووریای دیموکارت واژۆکرا، لە ڕێککەوتنامەکەدا کە هەشت خاڵی لەخۆگرتبوو هەردوولا ڕێککەوتن لەسەر یەکخستنی هێزەکانیان و  هێزەکانی هەسەدە دەبن بە بەشێک لە سوپای نیشتیمانی سووریا و دروستکردنی هێزێکی نیشتیمانی بە ئامانجی هاوبەش ڕاگەیێنرا.

لێدوانی فەرمی: هاکان فیدان، وەزیری دەرەوەی تورکیا لە کۆنگرەیەکی ڕۆژنامەوانیدا ڕایگەیاند: " ئەو ڕێککەوتنامەی کە لە نێوان یەپەگە و حکومەتی نوێی سووریا ئەنجامدرا، بە وردی چاودێری دەکەین و چاوەڕوانین بە زووترین کات خاڵەکانی ڕیککەوتنامەکە جێبەجێبکرێت، جێبەجێکردنی ئەو ڕێککەوتنامەیە کاریگەری ئەرێنی لەسەر تورکیا و عێراق و ئێران دەبێت." 

زانیاریی زیاتر: وەزیری دەرەوەی تورکیا لە درێژەی وتەکانیدا ڕایگەیاند: کاتی ئەوە هاتووە ناوچەیەکەی ئارام و سەقامگیر بۆ ڕۆژهەڵاتی ناوڕاست دروست بکرێت، چیتر ڕێگە بە هیچ گرووپ و هەڕەشەیەک نەدرێت ببنە مەترسی بۆ ئاسایشی وڵاتانی ناوچەکە و ڕۆژهەڵاتی ناوڕاست.