لاهوور شێخ جەنگی دەیەوێت ئۆپۆزیسیۆن لەژێر یەک چەتر کۆبکاتەوە

ئاڤا نیوز

چەند ڕۆژێکە لاهوور شێخ جەنگی کەوتووەتە جووڵە و سەردانی لایەنەکان دەکات. ئاڤا زانیویەتی پڕۆژەیەکی بەدەستەوەیە پەیوەستە بە ئۆپۆزیسیۆن، دەیەوێ ئەو لایەنانەی لە دەرەوەی دەسەڵاتن یەک دەنگ و یەک هەڵوێست بن و بەرەیەکی ئۆپۆزسیۆنی کارا پێکبهێنن.

چیرۆکی سەرەکی: بەمەبەستی دروستکردنی بەرەیەکی ئۆپۆزسیۆن، لاهوور شێخ جەنگی کە خاوەنی دوو کورسییە لە پەرلەمانی کوردستان، تاوەکو ئێستا سەردانی کۆمەڵی دادگەری و یەکگرتووی ئیسلامی کردووە.

زانیاریی زیاتر: بڕیارە لە ڕۆژانی داهاتوودا سەردانی سەرجەم لایەنەکانی دیکە بکات، ئەوانەی کە تاوەکو ئێستا ڕوون نەبووەتە بەشداری لە حکومەت دەکەن، یان نا.

لێدوانی فەرمی: سەرچاوەیەکی باڵا لە بەرەی گەل بە ئاڤای گوت، جگە لە پارتی و یەکێتی دەمانەوێ سەرجەم لایەنەکانی دیکە لەژێر چەترێکدا ئۆپۆزسیۆن بین، لە هەنگاوەکانی داهاتوودا دیدگا و بۆچوون و هەوڵوێستی هاوبەشمان لەسەر بارودۆخەکان هەبێت.

ئەوەی پێویستە بیزانیت: ئەوەی تاوەکو ئێستا یەکلایی بووەتەوە پارتی و یەکێتی دوو لایەنی پێکهێنەری سەرەکی حکومەت دەبن لەگەڵ 5 کورسی پێکهاتەکان. هێشتاش ڕوون نەبووەتەوە چەند لایەنی دیکە بەشداری حکومەت دەکەن، بەڵام پارتی سۆسیال دیموکرات، مەیلی بەشداریکردن لە حکومەتی هەیە.