یەکەمین کۆنفرانسی زانستیی نێودەوڵەتیی کوردانی ئێزدی بەڕێوەدەچێت

ئاڤا نیوز

بەچاودێری سەرۆکوەزیران مەسرور بارزانی یەکەمین کۆنفرانسی زانستیی نێودەوڵەتیی کوردانی ئێزدیی لە شاری دهۆک بەڕێوەدەچێت.

وێنە گەورەکە: بڕیارە ڕۆژی دووشەممە و سێشەممەی ئەم هەفتەیە کۆنفراسێکی زانستی نێودەوڵەتی  لەبارەی ئایین، کلتوور، جوگرافیا و مێژووی کوردانی ئێزدی لە شاری دهۆک بەڕێوەبچێت.

ئەوەی پێویستە بیزانیت: کۆنفراسەکە بە چاودێری مەسرور بارزانی، سەرۆکوەزیرانی کوردستانە و ماوەی ساڵێکە ئامادەکاری بۆ دەکرێت.

لێدوانی فەرمی: د. سەعید خودێدە، سەرپەرشتیاری کۆنفراسەکە بە ئاڤای وت، بۆ یەکەمجارە کۆنفراسێکی ئاوا فراوان لەسەر ئێزدییەکان دەکرێت، کۆنفراسەکە بە هاوبەشی لەنێوان بنکەی ڕۆشنبیری لالش و بەشی زانستە مرۆڤایەتییەکانی زانکۆی دهۆک ڕێکخراوە و  زیاد لە هەزار کەس ئامادە دەبن.

- لە کۆنفرانسەکەدا 105 توێژەر لە 10 وڵاتی جیاوازەوە هاتوون کە  80 توێژینەوە پێشکەش دەکەن.

- "هەندێ لە توێژینەوەکان بابەتی تازەیان لەسەر مێژوو و کولتووری ئێزدییەکان بە دۆکیۆمێنت ئاشکرا کردووە و بۆ ئێمە زۆر گرنگە".

- بەشێک لەو توێژەرانەی کە لە کۆنفراسەکە توێژینەوە پێشکەش دەکەن ئێزدی نین، بەڵکو لە وڵاتەکانی وەک میسر و ئێرانەوە هاتوون و توێژینەوە لەسەر مێژووی ئێزدییەکان پێشکەش دەکەن.

ئەمەش بزانە: لە کۆنفراسەکە جگە لە کونسوڵخانەکان، وا بڕیارە زانکۆکانی هەرێمی کوردستان و شارەکانی دیکەی عێراق وەک زانکۆی نەجەف و کوفە و بەغداش بەشداری بکەن.