ئاڤا فێڵی بەشێک لە کۆمپانیاکان بەناوی حەجەوە ئاشکرا دەکات

ئاڤا نیوز

ماوەی چەند ساڵێکە جۆرێک فێڵ پەیدا بووە، بەشێک لە کۆمپانیاکانی حەج و عومرە، ڕیکلام بۆ بەدەل حەج دەکەن. گوایە بەبڕێک پارە دەتوانن بەدەل حەج دابین بکەن. بەڕیوەبەرایەتی حەج و عومرەش داوا لە خەڵک دەکات پارەی خۆیان بۆ ئەم بابەتە بە فیڕۆ نەدەن.

بەدەل حەج چییە؟

کەسێک کە لە ژیان نەماوە، یان لە ژیانە و توانای ئەوەی نییە بچێتە حەج، کەسوکارەکەی پارە دەدەن بە یەکێک و ئەو لەبری ئەو کەسە حەجەکە دەکات.

لێدوانی فەرمی: خاوەنی یەکێک لە کۆمپانیاکانی حەج و عومرە بە ئاڤای وت: بەڵێ لەناو بەشێک لە کۆمپانیاکان ئەم بابەتە هەیە، تەنانەت کۆمپانیا هەیە ڕیکلامی ئەوە دەکات بە 500 دۆلار تا هەزار دۆلار بەدەل حەج دەکەن، بەڵام ئەمە هیچ ئەسڵ و ئەساسی نییە و فێڵێکە لە خەڵک دەکرێت.

زانیاریی زیاتر: بەگوتەی خاوەنی ئەو کۆمپانیایە لە کاتی مەراسیمی حەج نرخی هەموو شتێک دوو قاتە، نرخی پاس بۆ عەرەفە لەنێوان 50 دۆلار تا 150 دۆلارە، نرخی تاکسی لە ڕۆژی جەژن لەنێوان جەمرات و حەرەمی مەکە تا 150 دۆلارە، ئەوە جگە لە کرێی خواردن و مانەوەی هۆتێل. بۆیە هیچ کەسێک ناتوانێت بە 500 دۆلار و هەزار دۆلار پرۆسەی حەج بکات. لە کۆتایش دوای ئەوەی گوایە بەدەل حەجت بۆ کراوە، لە دوکانەکانی فۆتۆکۆپی لە سعوودیە بڕوانامە دروست دەکەن و هیچ ئەساسێکی نییە.

بۆچوونی لایەنی بەرامبەر: کاروان ستوونی، بەڕێوەبەری ڕاگەیاندنی حەج و عومرە لەسەر ئەم بابەتە بە ئاڤا میدیای وت:

٠ داوا لە خەڵک دەکەم پارەی خۆیان بۆ ئەم بابەتە بە فیڕۆ نەدەن، چونکە هەندێ کەس هەن بەناوی بەدەل حەج خەڵک ئیستیغلال دەکەن.

٠ ئەمساڵ بەڵێننامەمان بە هەموو کۆمپانیاکان پڕکردوەتەوە، هەر کۆمپانیایەک کاری بەدەل حەج بکات، هەرگیز دەرفەتی ئەوەی پێ نادرێت لە ئایندە کار لەسەر هێنانی حاجییان بکات.

٠ ئەو کەسانەی خەڵکی مەککەن و ماڵیان لە مەککەیە، ئەگەر بیانەوێت بەشداری پرۆسەی حەج بکەن، سێ هەزار دۆلار واتا 30 وەرەقەیان دەچێت، چۆن کەسێک لە کوردستانەوە دەتوانێت بەدەل حەج بە 500 دۆلار یان هەزار دۆلار بکات.