هیچ حاڵەتێکی گەنەی ئاژەڵان لە هەرێمی کوردستان تۆمارنەکراوە

ئاڤا نیوز

 

هەڵمەتی ڕشاندنی ئاژەڵ و کوشتارگەکان لە سەرتاسەری هەرێمی کوردستان دەستیپێکردووە و لە هەر ناوچەیەک چەند تیمێک دابینکراون بۆ ئەوەی ئەو ئاژەڵانەی گەنەیان هەیە جیان بکەنەوە.

 

وێنە گەورەکە: بەمەبەستی كۆنترۆڵكردنی نەخۆشی تای خوێن بەربوون كە نەخۆشیەكی ڤایرۆسی زۆر مەترسیدارە و بۆ مرۆڤ دەگوازێتەوە، لەبەر تۆماركردنی چەند حاڵەتێكی پشت ڕاستكراو لە هەندێك پارێزگاكانی عێراق، وەزارەتە پەیوەندیدارەکانی حکومەتی هەرێمی کوردستان بە چڕی هاتوونەتە سەرهێڵ بۆ ئەوەی ڕێگری لە بڵاوبوونەوەی بکەن.

 

لێدوانی فەرمی: د. فەرەیدون حەمەد، بەڕێوەبەری تەندروستی ئاژەڵ لە وەزارەتی کشتوکاڵ و سەرچاوەکانی ئاو بە ئاڤای گوت، "تیمەکانمان لەسەرجەم ناوچەکانی کوردستان بڵاوبوونەتەوە کردەی شوشتنی ئاژەڵەکان و ڕشاندنی شوێنی مانەوەیان دەکەن، تا ئێستا هیچ حاڵەتێکی گەنەی ئاژەڵان تۆمارنەکراوە، بەهۆی زۆری شوێنەکان پرۆسەکە ماوەی دوومانگ دەخایەنێت."

 

ئەوەی پێویستە بیزانیت: حکومەتی هەرێمی کوردستان ساڵی 2023، بڕی دوو ملیار و 700 ملیۆن دیناری بەمەبەستی کڕینی دەرمانی پێویست تەرخانکراوە بۆ ڤێرتێنەری، هاوکات بۆ ڕێگری کردن لە بڵاوبوونەوەی گەنەی ئاژەڵ کە دەبێتەهۆی تای خوێنبەربوون، دەرمانی دێلتامەسین و ئایڤێرت مەکتین بۆ تیمەکان ئامادەکراون.