دوو پێشمەرگە بەهۆی تەقینەوەی درۆنێک لە ئامێدی بریندار بوون

ئاڤا نیوز

 

بەرەبەیانیی ئەمڕۆ سێشەممە، دروست کاتژمێر 05:30 لە گوندی بلاڤە سەر بە ناحییەی دێرەلووک لە سنووری قەزای ئامێدی، درۆنێک لە سەنگەرێکی هێزی پێشمەرگەی زێرەڤانی تەقییەوە و دوو پێشمەرگە بریندار بوون و ڕەوشی تەندروستی یەکێکیان ناجێگیرە.

 

زانیاریی زیاتر: ئەم سەنگەرەی پێشمەرگە نوێیە و یەکەمجارە هێزەکانی زێرەڤانی تێیدا جێگیر دەبن، لەسەر داخوازیی خەڵکی ناوچەکە بووە، دوو ڕۆژە درۆن لە نزیک سەنگەرەکەیان دەتەقێتەوە و تاوەکو ئێستا بەوهۆیەوە پێنج پێشمەرگە بریندار بوون.

 

زانیاریی تابیەت: بەگوێرەی زانیارییە سەرەتایییەکان درۆنەکە هی پەکەکە بووە.

 

زانیاریی پەیامنێر: کاروان عەلی، پەیامنێری ئاڤا لە ئامێدی گوتی، "هەردوو پێشمەرگەکە گەیێنراونەتە نەخۆشخانە و تەندروستی یەکێکیان ناجێگیرە و ڕەوانەی دهۆک کراوە."

 

ئەمەش بزانە: ئەمە لەکاتێکدایە ئێوارەی دوێنێ بەهۆی تەقینەوەی درۆنێک لەهەمان شوێن سێ پێشمەرگەی زێرەڤانی بەهۆیەوە برینداربوون.