سەرۆککۆماری عێراق واژۆی لەسەر بەپارێزگابوونی هەڵەبجە کرد

ئاڤا نیوز

 

کاتژمێر 11:35، خولەکی پێش نیوەڕۆی ئەمڕۆ سێشەممە د.لەتیف ڕەشید، سەرۆککۆماری عێراق لە کۆشکی کۆماری لە بەغدا، ئیمزای لەسەر یاسای بەپارێزگابوونی هەڵەبجە کرد.

 

ئەوەی پێویستە بیزانیت: هەڵبژاردنی کاتژمێر 11:35 بۆ واژۆکردنی یاساکە، بۆ ڕێزگرتنە لە ڕۆحی شەهیدانی هەڵەبجە، لەو کاتە حکومەتی بەعس شاری هەڵەبجەی کیماباران کرد و زیاتر لە پێنج هەزار هاونیشتمانی شەهید کرد.

 

بۆچی گرنگە: بە واژۆکردنی یاساکە، پرۆسەی بەپارێزگابوونی هەڵەبجە وەک نۆزدەهەمین پارێزگای عێراق هەنگاوێکی گرنگ دەبڕێت و دەنێردرێت بۆ وەزارەتی داد بۆ ئەوەی لە ڕۆژنامەی فەرمی "وەقائیعی عێراق"ـی بڵاوبکرێتەوە و بخرێتە بواری جێبەجێکردن.

 

ئەمەش بزانە: حکومەتی هەرێمی کوردستان ساڵی 2013 ڕەشنووسی بەپارێزگابوونی هەڵەبجەی ڕادەستی نوری مالیکی، سەرۆکی ئەو کاتەی حکومەتی عێراق کرد.

 

باکگراوند: دواتر لە 13ی ئاداری 2014 حکومەتی هەرێمی کوردستان بڕیاری بەپارێزگابوونی هەڵەبجەی دەرکرد. ڕۆژی 14ـی نیسان پەرلەمانی عێراق دەنگی لەسەر پڕۆژە یاسای بەپارێزگابوونی هەڵەبجە دا، بەمەش هەڵەبجە بوو بە نۆزدەهەمین پارێزگای عێراق.