وەزیری بەرگریی پاکستان داوا لە هیندستان دەکات چەکی ئەتۆمی بەکارنەهێنێت

ئاڤا نیوز

 

دوای دروستبوونی شەڕ و ئاڵۆزیی سوپای هیندستان سنووری کشمیری بە ناوچەی نائاسایی و جەنگی لەناکاو ڕاگەیاندووە، لەبەرامبەریشدا وەزارەتی بەرگری پاکستان هێزی زیاتر ڕەوانەی سەر سنوور کردووە. 

 

وێنە گەورەکە: ڕۆژی سێشەممە 22-4-2025، گرووپێکی چەکداریی هێرشیان کردووەتە سەر هەرێمی کشمیر لە خاکی هیندستان، بەهۆی ئەمەوە لەماوەی هەفتەی ڕابردوودا چەندین جار ڕووبەڕووبوونەوەی سەربازی بە چەکی بچووک لە نێوان سوپای هەردوو وڵات ڕوویداوە، لێکەوتەی بەردەوام ئەم شەڕەش کاریگەری خراپی هەیە بەهۆی ئەوەی هەردوو وڵات خاوەنی چەکی ئەتۆمین. 

 

لێدوانی فەرمی: خەواجە محەممەد عاسیف، وەزیری بەرگری پاکستان لە لێدوانێکی ڕۆژنامەوانیدا ڕایگەیاند، هێزی زیاتر ڕەوانەی سنووری کشمیر کراوە و ئەگەری هێرشی سەربازی سوپای هیندستان لە کاتژمێری سفردایە. 

 

- پێویستە هەردوو وڵات بەکارهێنانی چەکی ئەتۆمی لە بژاردە سەربازییەکانیاندا دەربکەن، چونکە بەکارهێنانی ئەو چەکە هەردوو وڵات بە تەواوی وێران دەکات. 

 

ئەوەی پێویستە بیزانیت: هەرێمی کشمیر، خاکێکی دابەشکراوە لە نێوان هیندستان و پاکستان و چین، بە درێژایی 740 کیلۆمەتر سنورێکی هاوبەشی لە نێوان هیندستان و پاکستان دروستکردووە و ناوچەیەکی جێناکۆکی مێژوویە لە نێوان هەردوو دەوڵەت.