لە بازگەکانی مەخموور ڕێگری لە کاسبکارانی کورد دەکرێت

ئاڤا نیوز

 

ئاڤا بەدواداچوون لەبارەی ڕێگرییەکانی بازگەکانی عێراق لە کاسبکارانی کورد بۆ هێنانی شتومەک بۆ مەخموور دەکات، بە گوتەی بەرپرسێکی باڵاش، "کێشەکە سیاسیە و حکومەتی عێراق نایەوێ چارەسەری بکات".

 

وێنە گەورەکە: کاسبکارانی قەزای مەخموور لەلایەن بازگەکانی سەر بە حکومەتی عێراق لە شارۆچکەکەوە ڕێگەیان پێنادرێت کەلوپەل و پێداویستییە سەرەکیەکان لە پارێزگای هەولێرەوە هاوردەی مەخمور بکەن، تەنها بەیەک مەرجیش ڕێگە دەدرێت کەلوپەل هاوردەی مەخموور بکەن؛ ئەویش پێدانی پارەیە بە بازگەکان.

 

قوڵتر: سەرەڕای ڕێگریکردن لە کاسبکارانی کورد لەلایەن بازگەکانی حکومەتی عێڕاق، وەرگرتنی سەرانەش یەکێکی دیکەیە لە پیشەی سەربازە عێڕاقییەکان بۆ پەڕاندنەوەی ئەو کەلوپەلانەی کاسبکارانی کورد بۆ مەخمور هاوردەی دەکەن، ئەگەر بێت و هەر کەسێکیش ئەو پارەی لێی داوا دەکرێت، نەیدات، دەبێت بە ناچاری ڕێگایەکی دوورتر ببڕێت تاوەکو لە هەولێرەوە دەگاتە مەخمور. 

 

لێدوانی فەرمی: فەهمی بوڕهان، سەرۆکی دەستەی گشتیی ناوچە کوردستانییەکانی دەرەوەی ئیدارەی هەرێم دەڵێت: کێشەکانی مەخموور و تەواوی ناوچەکە کوردستانیەکانی دەرەوەی ئیدارەی هەرێم سیاسییە و  حکومەتی عێڕاق نیازی چارەسەرکردنیانی نییە. 

ئەمەش بزانە: شارۆچکەی مەخموور  سەر بە ناوچە کوردستانیەکانی دەرەوەی ئیدارەی هەرێمی کوردستانە، لە ڕووی جوگرافییەوە بەدووری 65 کیلۆمەتر دەکەوێتە ڕۆژئاوای شاری هەولێر، ڕێژەی دانیشتووانی سەنتەری قەزاکە و 31 گوندی دەورووبەریشی نزیکەی لە 55 هەزار کورد و عەرەب پێکدێت، زۆرینەشیان کوردن.