چیرۆکی ناخهەژێنی دایکێک: کوڕەکەی پێنج ساڵە لە ئەوروپا بێسەروشوێنە

ئاڤا نیوز

دایکێک لە شاری هەولێر پێنج ساڵە کوڕە گەورەکەی لە ئەوروپا بێسەروشوێنە و تاوەکو ئێستا چارەنووسی نازانن.

چیرۆکی سەرەکی: ئافرەتێک بەناوی حاجی بەهار کە خەڵکی هەولێرە، ماوەی پێنج ساڵە کوڕە گەورەکەی ڕۆیشتووە بۆ دەرەوە و لەو کاتەوە دەنگی نیە، نازانن کوڕەکەیان مردووە یان زیندووە.

لێدوانی فەرمی: حاجی بەهار بە ئاڤای ڕاگەیاند، "ژیاری کوڕە گەورەم تەمەنی ئێستا 45 ساڵە، ئەو لە ساڵی 2020 بەقاچاخ چووە بۆ ئەورووپا و گەیشتە بولگاریا و هەتا دوو مانگیش بەتەلەفۆن قسەمان لەگەڵ یەکتر کردووە، دوای ئەوە هیچ دەنگی نەما و تەلەفۆنەکەی داخرا".

- ژیار ژنی هێنابوو، کوڕێکی سێ ساڵانیشیان هەبوو.

- پێش ئەوەی خۆی بڕوا ژن و منداڵەکەی بە قاچاخ ناردبوو بۆ ئەوروپا و گەیشتبوونە ئەڵمانیا.

- ژیار کاتێک گەیشتبووە بولگاریا، وەکو ژنەکەی گێڕاوییەتییەوە، ئەوکاتە لە ژیار جیابووەتەوە.

کاریگەری و لێکەوتەکان: حاجی بەهار بەهۆی کوڕە گەورەکەیەوە ژیانی لێ تاڵ بووە، بەردەوام لەخەیاڵی ژیار دایە، هەمیشە  لەگەڵ وێنەکانی قسە دەکات.

لەلایەکی دیکەوە: هیشام سەعید، پەیامنیری ئاڤا میدیا پەیوەندی بە فەرمانگەی پەیوەندییەکانی دەرەوەی حکومەتی هەرێمی کوردستان کردووە، پێیان گوتووە: با حاجی بەهار پەیوەندیمان پێوە بکات و ئێمەش لەڕێگەی نوێنەرایەتییەکانی حکومەتەوە بەدواداچوون دەکەین.