فایلی خەڵک؛ قوتابیانی بەشە ناوخۆیی شەهید شەوکەت بەهۆی کەمی خزمەتگوزاری نیگەرانن

ئاڤا نیوز

بەشێكی ژوورەکانی بەشەناوخۆیی شەهید شەوکەت سیستەمی فێنککەرەوەیان لەکارکەتوون و قوتابییەکان لەتاو گەرما لە باخ و چیمەنی بەشەناوخۆییەکەدا دەخەون.

وێنە گەورەکە: قوتابیانی بەشەناوخۆیی شەهید شەوکەت، بەهۆی کارنەکردنی سیستەمی سارکەرەوە شەوان لەناو باخچەی بەشەناوخۆییەکە دەخەون و وانەکانیان دەخوێنن، بەڵام بەهۆی هەبوونی مێش و مەگەز ناتوانن بخەون و نیگەرانن لەو دۆخە، چەندینجار سەردانی بەڕێوەبەری بەشەناوخۆییان کردووە، بەڵام تائێستا کێشەکەیان چارەسەر نەکراوە.

لێدوانی فەرمی: سامان عەبدوڵڵا، وتەبێژی سەرۆکایەتیی زانکۆی سەڵاحەددین، بە ئاڤا میدیای ڕاگەیاند، "کێشەی سارکەرەوەکان تەکنیکییە و بەزووترین کات چارەسەری دەکەین.

- "ساڵانە لەگەڵ هاتنی وەرزی گەرما پێویستە خزمەتگوازی و چاککردنەوە بۆ سەرجەم سارکەرەوەکان بکرێت، بەشەناوخۆییەکەش گەورەیە بە ڕۆژێک کارەکانی تەواو نابێت، بۆیە قوتابیان دڵنیا دەکەینەوە لەم هەفتەیە چارەسەری تەواوی سیستمی ساردکەرەوەکان دەکەین".

- مانگانە بڕی 50 ملیۆن دینار بۆ کڕینی گازی سیستمی فێننکەرەوەکان تەرخان دەکرێت، هاوکات بۆ سیانەی بەشەناوەخۆییەکان بودجەی تایبەتی بۆ تەرخان دەکرێت و لەلایەن تیمەکانی تەکنیکی زانکۆی سەڵاحەددین بەردەوام سیانە دەکرێن.

ئەوەی پێویستە بیزانیت: لە بەشەناوەخۆییەکانی زانکۆی سەڵاحەددین نزیکەی پێنج هەزار قوتابی نیشتەجێن و هەموو هەولێک بۆ خزمەتکردنیان دەدرێت.