فایلی خەڵک؛ ماوەیەکە لە نیوەشەودا دزی لە ئاژەڵدارەکانی نزیک بەحرکە دەکرێت

ئاڤا نیوز

ماوەیەک لە نیوەشەودا دزی لە ئاژەڵدارەکانی نزیک بەحرکە دەکرێت. بۆ ئەم مەبەستە چەندین کەس لەسەر دزینی مەڕ و ماڵات دەستگیرکراون.

وێنە گەورەکە: چەند هاونیشتمانییەکی گوندەکانی نزیک بەحرکە دەڵێن، چەند جارێکە، شەوان دوای کاتژمێر یەکی شەو کاتێک کارەبا دەکوژێتەوە، چەند دزێک تاریکی بە دەرفەت دەزانن و ئاژەڵ دەدزن. لەماوەی ڕابردوو چەندین جار لە چەند گوندێک ئەم دزیکردنە دووبارە بووەتەوە و داوای چارەسەر دەکەن.

زانیاریی تایبەت: ئاڤا میدیا بەدواداچوونی بۆ کێشەی ئەو ئاژەڵدارانە کردووە و لەگەڵ پۆلیسی نەهێشتنی تاوانی بەحرکە قسەی کردووە، ئەوان دەڵێن: بەڵێ حاڵەتی دزیکردنی مەڕ و ماڵات هەیە و لە ڕابردوو چەندین کەس لەسەر دزی ئاژەڵ دەستگیر کراون. هەر ئاژەڵدارێک دزی لێکرا با بێنە لای ئێمە لێکۆڵینەوە دەکەین و دزەکان دەربازیان نابێت.

- پۆلیسی نەهێشتنی تاوانی بەحرکە گلەییەکیش لە ئاژەڵداران دەکات و دەڵێت، ئاژەڵداران بەشێکی زۆریان کەمتەرخەمن، هەندێکیان دوای مانگێک لە دزییەکە ئینجا سکاڵا تۆمار دەکەن.

- هەندێکی دیکەیان شوێنی ئاژەڵیان لە دەرەوەی ئاوەدانی دروستکردووە بەبێ ئەوەی کامێرای بۆ دابنێن، ئەوانەشی کامێرای بۆ دادەنێن، دوای ئەوەی درەنگی شەو کارەبا دەبڕێت، کامێراکە هیچ تۆمار ناکات، بۆیە دۆزینەوەی دزەکان زەحمەت ئەبێت.