ئەمڕۆ ئەنجوومەنی وەزیران باسی چی دەکات؟

ئاڤا نیوز

 

ئەمڕۆ ئەنجوومەنی وەزیرانی هەرێمی کوردستان کۆدەبێتەوە و دوو بڕگە گفتوگۆیان لەبارەوە دەکرێت، یەکێکیان پێشنیازی ڕەشنووسی بڕیارێکی ئەنجوومەنی وەزیرانە بۆ ڕێکخستنەوەی دامەزراوەی بەڕێوەبردنی خانەنشینیی گشتی لە هەرێمی کوردستان.

 

وێنە گەورەکە: ئەمڕۆ چوارشەممە، ڕێککەوتی 30ـی 4ـی 2025, ئەنجوومەنی وەزیرانی هەرێمی کوردستان بەسەرپەرشتی سەرۆکوەزیران مەسرور بارزانی و بە ئامادەبوونی قوباد تاڵەبانی، جێگری سەرۆکوەزیران کۆدەبێتەوە؛ لە کۆبوونەوەکەدا دوو بڕگە تاوتوێ دەکرێن؛ ئەوانیش دوایین پێشهاتەکان بۆ هەناردەکردنەوەی نەوتی هەرێمی کوردستان و ڕێکخستنەوەی دامەزراوەی بەرێوەبردنی خانەنشینیی گشتیی.

 

ڕاگەیێنراوی فەرمی: ئەنجوومەی وەزیرانی هەرێمی کوردستان ڕاگەیاند، لە بڕگەی یەکەمدا، دواپێشهاتەکانی پەیوەست بە گفتوگۆی هەناردەکردنەوەی نەوتی هەرێمی کوردستان لە ژێڕ ڕۆشنایی یاسای هەمواری یەکەمی یاسای بودجەی گشتیی عێراقی فیدراڵ و کۆبوونەوەکان لەگەڵ حکومەتی فیدراڵی و کۆمپانیا نەوتییەکان لەمبارەیەوە دەخرێتە ڕوو.

 

ئەوەی پێویستە بیزانیت: وەک لە ڕاگەیێنراوەکەی ئەنجوومەنی وەزیراندا هاتووە، "لە بڕگەی دووەمدا، پێشنیازی ڕەشنووسی بڕیارێکی ئەنجوومەنی وەزیران بۆ ڕێکخستنەوەی دامەزراوەی بەڕێوەبردنی خانەنشینیی گشتی لە هەرێمی کوردستان، لەژێر ڕۆشنایی یاسای خانەنشینیی یەکگرتوو ژمارە (9)ی ساڵی 2014ی بڕیاری دادگاری فیدراڵی گفتوگۆ دەکرێ".