مەزارگەی کەندە کۆخە لە هەولێر؛ چی لەبارەوە دەگوترێت؟

ئاڤا نیوز

 

ئاڤا بەدواداچوون بۆ مەزارگەی کەندە کۆخە لە هەولێر دەکات و چیرۆکە جیاواز و نەبیستراوەکانی لە دەمی دەروێشێکەوە دەگێڕێتەوە. 

 

چیرۆکی سەرەکی؛ مەزارگەکە لە نێوان گەڕەکی گڵکەند و تەعجیلە لە شاری هەولێر. گۆڕەکە هیچ ناوێکی لەسەر نییە و دەگوترێت "گۆڕی پیاو چاکێکە". لە دەرەوە کە سەیری دەکەی نازانی ئەمە مەزارگەیە، چونکە هاوشێوەی ماڵێکە، کە دەرگا دەکەیتەوە و دەچیتە ژوورەوە، تەنیا یەک گۆڕی تێدایە. مەزارگەکە ناوی کەندە کۆخە لە هەولێر و بەو ناوە لەناو خەڵکی شارەکە ناسراوە.

 

بەدواداچوونی ئاڤا؛ لەبارەی مەزارگەکەوە، عوبەید هەرکی، پەیامنێری ئاڤا بەدواداچوونی کردووە و زانیاری لە دەروێشێکەوە دەستکەوتووە،  ئەوەیش ئەوەیە کە "کاتی خۆی لەتەنیشت گۆڕەکە قامیشی لێبووە، خەڵک هاتووە قامیشەکەی بردووەتەوە ماڵەوە و کوڵاندویەتی و ئاوەکەیان خواردووەتەوە، تاوەکو وەک چارەسەری کۆخە، هەوکردنی قورگ، سنگ و چەندین نەخۆشی دیکە سوودی لێوەربگرن.

 

لەلایەکی دیکە؛ هەر لەبارەی مەزارگەکەوە، مام حاجییەکی دیکەش دەڵێت، "تا ئێستاش ناوە بەناوە ژنان و بەتایبەتیش بەتەمەنەکان قوڕی لای ئەم مەزارگەیە دەبەن و لایان پیرۆزە و لەنێوچاوانیان دەدەن".

لێدوانی فەرمی: نەبەز ئیسماعیل، وتەبێژی وەزارەتی ئەوقافی هەرێمی کوردستان دەڵێت، ئەو مەزارگەیە و چەندین مەزارگەی دیکەمان لە هەولێر هەن، وەکو سوڵتان موزەفەر و نەبی عوزێر و هەندێکی دیکەش، ئەوقاف خۆی سەرپەرشتیان دەکات و کارمەندیشی بۆ داناون.