لە ڕۆژهەڵاتی کوردستان دوو قەیرانی نوێ سەرهەڵدەدەن

ئاڤا نیوز

 

لە ڕۆژهەڵاتی کوردستان دوو قەیرانی نوێ سەریانهەڵداوە، یەکێکیان کەمی شیری وشکی منداڵانە لە کەنگاوەر؛ ئەوی دیکەش داخستنی بەشێک لە نانەواخانەکانی شاری سنەیە بەهۆی زۆری خەرجییەوە.

 

وێنە گەورەکە: چەند ساڵێکە بەهۆی سەپاندنی سزا ئابوورییەکانی ئەمریکا و ڕۆژئاوا بەسەر ئێران، خەڵکی وڵاتەکە لە دۆخێکی سەختی ئابووریدا دەژین؛ بەجۆرێک نرخی شتومەک و پێداویستییە سەرەتاییەکان گەیشتووەتە ئاستێک کە لە توانای بەشێکی زۆری خەڵکدا نەماوە. ڕۆژهەڵاتی کوردستانیش پشکی شێری لە دۆخە سەختە تاقەتپڕوکێنە ئابوورییەکەی ئێران بەرکەوتووە.

 

چی ڕوودەدات: تازەترین قەیران کە بەرۆکی خەڵكی ڕۆژهەڵاتی کوردستانی گرتووە، قەیرانی کەمی شیری وشکی منداڵانە لە شاری کەنگاوەری سەر بە پارێزگای کرماشان. بەجۆرێک هەندێک جار خەڵکی کەنگاوەر بۆ دەستخستنی شیر ڕوودەکەنە شارۆچکەکانی دراوسێ.

 

زانیاریی زیاتر: هاوکات بەشێکی دیکەی  خەڵکی بۆ دەستخستی شیری منداڵان ڕوودەکەنە دەرمانخانەکان، بەڵام لەوێ نرخەکەی بەجۆرێک گرانە کەم خێزان هەیە توانای هەبێت بیکڕێت.

 

ئەوەی لەبارەیەوە دەگوترێت؛ دایک و باوکان قوتوی شیریان ناو لێناوە "قوتوی هیوا". ئەوان بەیانیان زوو لە خەو هەڵدەستن، نەک بۆ چوون بۆ کار، بەڵکو بۆ گەڕان بەدوای شیر لە دەرمانخانەکاندا. 

 

لەلایەکی دیکە؛ هەر قەیرانی کەمی شیر نییە، ئێستا بەهۆی زۆری خەرجییەوە بەشێکی نانەواخانەکانی سنە  دووکانەکانیان داخستووە.

 

بۆچوونی لایەنی بەرامبەر: نانەواخانەکان دەڵێن، ئەو ئاردەی پێمان دەدەن کەمە، یان دەبێت گونکی نانەکە بچووک بکەینەوە، یان نانەواخانەکانمان دابخەین. 

 

ئەوەی پێویستە بیزانیت: تا ئێستا 17 نانەوا  دوکانەکانیان داخستوون، هەندێکیش سەندیکا دایخستوون، لەبەر ئەوەی نانیان گران کردووە و گونکی هەویریان بچووک کردووەتەوە.