دادگەی فیدراڵی بڕیارێكی لەبارەی ماڵپەڕە سێكسییەكان دەركرد

ئاڤا نیوز

دادگەی فیدراڵیی عێراق، لەسەر بنەمای سکاڵایەک بڕیاری دا بە ناچارکردنی وەزارەتی پەیوەندییەکان بە دانانی پۆڵێنێکی تایبەت بۆ بەکارهێنەرانی ئینتەرنێت.

چیرۆکی سەرەکی: سعود ساعدی،  یەکێکە لە سکاڵاکارەکان لە پەیامێکی ڤیدیۆییدا لە بەردەم دادگە دەڵێت: دادگە ڕەزامەند بووە لەسەر سکاڵایەکمان بەقەدەغەکردنی ماڵپەڕە ناڕەوشتییەکان و بڵاوکردنەوەی بابەتی نێوەڕۆک نەشیاو و سێکسی لە تۆڕە کۆمەڵایەتییەکاندا".

ئەوەی پێویستە بێزانیت: سکاڵاکە لە دژی وەزارەتی پەیوەندییەکان، دەستەی ڕاگەیاندن و پەیوەندییەکان، سەرۆکوەزیران و سەرۆکی پەرلەمان بووە، تێیدا داواکراوە سکاڵالێکراوان ناچار بکرێن بە دانانی پۆلێنێک، کە بگونجێت لەگەڵ بەها و ئاکاری کۆمەڵگەی عێراق.

بۆچی گرنگە: دادگە لە بڕیارەکە  تێیدا ئەوەی دەستنیشان کردووە کە چی قەدەغەیە و چی ئاساییە نمایش بکرێت، ئەوەش بەگوێرەی شوێن و تەمەنەکان، هەروەها منداڵان لە نێوەڕۆکی نەشیاو بپارێزرێن.

باکگراوند:  14ـی کانوونی یەکەمی 2023، دادگەی باڵای فیدراڵی بڕیارێکی کاتی دەرکرد بۆ ڕاگرتنی ماڵپەرە سێکسییەکان لە عێراق تاوەکو ئەو کاتەی سکاڵاکە یەکلایی دەبێتەوە. هەمان ڕۆژ باسم خەشان، رایگەیاند، سکاڵاکەیان بەئاڕاستەی ئەوەیە، بەکارهێنانی ئەو ماڵپەڕانە رێکبخرێنەوە بە جۆرێک لەگەڵ بەها و ئاکاری کۆمەڵگە بگونجێت.