ئیدارەی ڕۆژئاوای کوردستان داوای ڕاگرتنی گرژییەکانی ریفی دیمەشق دەکات

ئاڤا نیوز

 

ئیدارەی خۆبەڕێوەبەریی ڕۆژئاوای کوردستان ڕایگەیاند، گرژیی و پێکدادانەکانی پارێزگای ریفی دیمەشق جێگەی نیگەرانییە و پێویستە ڕابگیرێن، داواش لە حکومەتی سووریا دەکات ڕێگریی بکات لە کوشتنی خەڵک لەسەر بنەمای مەزهەبی.

 

ئەوەی پێویستە بیزانیت: گرژییەکانی چەند ڕۆژی ڕابردووی شاری جەرمانا و ئەشرەفییە سحنایا لە پارێزگای ریفی دیمەشق دیمەنی ڕووبەڕووبوونەوەیەکی مەزهەبی وەرگرتووە، لە ڕووبەڕووبوونەوەی نێوان گرووپە چەکدارەکانی دروز و هێزەکانی حکومەتیش، 16 ئەندامی هێزەکانی حکومەت و دەیان کەسی دیکەش لە ئەندامانی گرووپەکان و خەڵکی مەدەنی گیانیان لەدەستداوە.

 

ڕاگەیێنراوی فەرمی: ئیدارەی خۆبەڕێوەبەریی ڕۆژئاوای کوردستان لەبارەی ڕووداوەکانی سێ ڕۆژی ڕابردووی پارێزگای ریفی دیمەشق ڕاگەیێنراوێکی بڵاوکردەوە و داوا لە هەموو لایەنەکان دەکات "دۆخەکە هێوربکەنەوە و حکومەتی دیمەشقیش دەستوەردان بکات تا ڕووداوەکانی هاوشێوەی کەناراوەکانی سووریا لە کوژرانی خەڵک لەسەر بنەمای مەزهەبی دووبارە نەبێتەوە.

 

 - دەبێت چارەسەری ئەو هۆکارانە بکرێت کە بوونەتەهۆی سەرهەڵدانی گرژییەکان، سیستمێکی دیموکراسیی و فرەییش دروستبکرێت بەبەشداریی هەمووان.
 
- گفتوگۆ بکرێت بۆ چارەسەری کێشەکان و چارەسەری سەربازی بە هەموو شێوەیەک ڕەتدەکەینەوە.

 

- ئێستا سووریا لە هەموو کات زیاتر پێویستی بە دەستوور و حکومەتێک هەیە کە مافی هەمووان گەرەنتی بکات و ڕەچاوی بەشداریی هەمووان لە پرۆسەی سیاسییدا بکات.