داوایەکی نوێی یەکێتی لەبارەی پۆستی جێگری سەرۆکوەزیران

ئاڤا نیوز

 
بڕیارە جارێکی دیکە شاندی دانوستاندنکاری پارتی و یەکێتی کۆببنەوە، ئەندامێکی کۆمیتەی ناوەندیی پارتی دەڵێت، "یەکێتی داوای نووسینەوەی دەسەڵاتەکان دەکات'.

 

وێنە گەورەکە: کۆبوونەوەکان بۆ پێکهێنانی کابینەی نوێ بەردەوامن و ڕۆژی 28-4-2025، سەرۆکوەزیران مەسرور بارزانی و بافڵ تاڵەبانی، سەرۆکی یەکێتیی نیشتمانیی لە دووکان کۆبوونەوە، هەر هەمان ڕۆژ شاندی دانوستاندنکاری پارتی و یەکێتی لەبارەی دابەشکردنی پۆستەکان لە دووکان کۆبوونەوە.

 

لێدوانی فەرمی: ئەندامێکی کۆمیتەی ناوەندیی پارتی بە ئاڤا میدیای ڕاگەیاند: بڕیاربوو  هەردوو شاندی دانوستاندنکار لەم ڕۆژانە کۆببێتەوە، بەڵام کۆبوونەوەکە بۆ هەفتەی داهاتوو دواخراوە و ڕۆژەکەشی دیاری نەکراوە.

 

-شاندی دانوستاندنکاری یەکێتی دێتە هەولێر و کۆبوونەوەکە لە هەولێر دەکرێت.

-تاوەکو ئێستا هیچ ڕێککەوتنێک لەسەر پۆستەکان نەکراوە و گفتوگۆکردن بەردەوامە.

 

-هەوڵەکان چڕکراونەتەوە و کارەکان تەواوکراون، بۆ ئەوەی تاوەکو کۆتایی مانگی پێنج ڕێککەوتن بکرێت و کابینەی 10 پێکبهێنرێت، چونکە هەڵبژاردنی پەرلەمانی عێراقیشمان لە پێشە و دەبێت ئامادەکاری بۆ بکرێت.

 

ئەوەی پێویستە بیزانیت: بەگوێرەی ئەو ئەندامەی کۆمیتەی ناوەندیی پارتی، "یەکێتی داوای نووسینەوەی دەسەڵاتەکانی جێگری سەرۆکی حکومەت و زیادکردنیان دەکات، هەروەها داوای دیاریکردنی دەسەڵاتەکانی سەرۆکی پەرلەمان و جێگرەکەی دەکات.

 

زانیاریی ئاڤا: "یەکێتی داوای پۆستی سەرۆکی هەرێمی کوردستان، وەزارەتی سامانە سروشتییەکان، وەزارەتی دارایی و ئابووری، وەزارەتی شارەوانی و وەزارەتی ناوخۆ دەکات، بەڵام پارتیش چاوی لەسەر وەزارەتەکانی شارەوانی و ناوخۆ و سامانە سروشتییەکان و سەرۆکی هەرێمە، ڕەنگە سەرۆکی ئەنجوومەنی دادوەری و سەرۆکی پەرلەمان و وەزارەتی شارەوانی بە یەکێتی بدرێت." ئەو ئەندامەی کۆمیتەی ناوەندیی پارتی وادەڵێت.