لێکتێگەیشتنێک لەنێوان پارێزگاری هەولێر و زنجان واژۆ دەکرێت

ئاڤا نیوز

 

لێکتێگەیشتنێک بۆ پتەوکردنی پەیوەندییەکانی نێوان هەردوو پارێزگای هەولێر و زنجانی ئێران واژۆ کرا.

 

وێنە گەورەکە: ڕۆژی پێنجشەممە، 30-4-2025، ئومێد خۆشناو، پارێزگاری هەولێر و سەید موحسن سادقی، پارێزگاری زنجانی ئێران، لە دیوانی پارێزگای زنجان کۆبوونەوە و لێکتێگەیشتنێکیان لە بواری ئابووری بۆ بەهێزکردنی پەیوەندییە بازرگانییەکانی نێوان هەردوو پارێزگا واژۆکرد.

 

ڕاگەیێنراوی فەرمی: پارێزگای هەولێر بڵاویکردەوە، لەپێناو پتەوکردنی پەیوەندییە گشتییەکانی نێوان هەولێر و زنجان، بەهێزکردنی جموجوڵی بازرگانی و ئابووری، بەرفراوانکردنی بەرژەوەندییە ئابوورییە هاوبەشەکان و گەیشتن بە ڕێککەوتن، لێکتێگەیشتنێک لەنێوان پارێزگارەکانی هەولێر و زنجان واژۆ کرا.

 

لێکتێگەیشتنەکە بەمشێوەیە: دەقی لێکتێگەیشتنەکەی نێوان پارێزگاری هەولێر و پارێزگاری زنجان بەمشێوەیە؛-

 

-هەولێر و زنجان بەمەبەستی بەهێزکردنی هاوکاریی تەکنەلۆژی و پیشەسازی، بیروڕا لەبارەی دۆخی ئابووری و بازرگانی و گۆڕانکاری لە ڕێنماییەکان ئاڵوگۆڕ دەکەن.

 

-هەردوولا لەو چالاکییانەی کە دەتوانن بازرگانیی نێوان پارێزگای هەولێر و زەنجان بەرەوپێش ببەن، یەکتر ئاگادار دەکەنەوە.

 

-پارێزگای هەولێر و زنجان لە ڕێکخستنی شاندی بەرپرسانی پارێزگا بەمەبەستی ئاسانکاریی هاوکاریی بازرگانی، گەشتیاری، پیشەسازی، خزمەتگوزاریی تەکنیکی و ئەندازیاری، تەندروستی و وەرگرتنی قوتابیانی زانکۆ، هاوکاریی یەکتر دەکەن.

-هەردوو پارێزگا لە بواری پێشانگاکان و پێشانگا نێودەوڵەتییەکان و بەرەوپێشبردنی بازرگانی هاوکار دەبن و پاڵپشتی ئەندامەکانیان بۆ بەشداریکردن لەو بۆنانە دەکەن.

 

-هەردوولا هاندەر و پشتگیری لە پەرەپێدانی پڕۆژەی هاوبەش و دەرفەتی وەبەرهێنان و قازانجی هاوبەش دەکەن.