ئەنجوومەنی پارێزگای نەینەوا شەش مانگە پەكی كەوتووە

ئاڤا نیوز

 

سەرۆكی فراكسیۆنی پارتی لە ئەنجوومەنی پارێزگای نەینەوا ڕایدەگەیەنێت، ئەنجوومەنی پارێزگا شەش مانگە هیچ دانیشتنێكی ئەنجام نەداوە، بەم هۆیەوە زیانێكی زۆر بە هاووڵاتیان كەوتووە.

 

وێنە گەورەكە: ئەنجوومەنی پارێزگای نەینەوا لەسەر داوای 14 ئەندامی ئەنجوومەنەكە، لە دانیشتنی ڕۆژی 5-3-2025، بەزۆرینەی ڕەها دەنگیان لەسەر لادانی ئەحمەد حاسوود، سەرۆکی ئەنجوومەنی پارێزگاکە لە پۆستەکەی دا، ئەویش لە دادگەی کارگێڕی سکاڵای تۆمارکرد و ڕۆژی 09-03-2025، دادگەی کارگێڕیی عێراق بە فەرمانێكی سالاری، بڕیاری دوورخستنەوەی ئەحمەد حاسوودی ڕاگرت، تاوەکو دۆسیەکەی لە دادگە یەکلادەبێتەوە، بەر لەو پێشهاتەش ئەنجوومەنەكە لە مانگی كانوونی یەكەمی ساڵی ڕابردووەوە بەهۆی كێشە و ناكۆكییە سیاسییەكان و تەواونەبوونی نیسابی دانیشتنەكان، هیچ كۆبوونەوەیەكی ئەنجام نەدابوو.

 

لێدوانی فەرمی: ئەحمەد كیكی، سەرۆكی فراكسیۆنی پارتی دیموكراتی كوردستان لە ئەنجوومەنی پارێزگای نەینەوا تایبەت بە ئاڤا ڕایگەیاند، بەهۆی ناكۆكی سیاسی و پەیڕەوكردنی سیاسەتی پشتگوێخستنی هاوسەنگی و شایستەبوون، دانیشتنەكانی ئەنجوومەن پەكی كەوتووە و سەرۆكی ئەنجوومەنەكەش دوای وەرگرتنەوەی متمانە لێی، شەرعیەتی نەماوە.

- ئەوەشی باسكرد، ڕۆژی 4ـی ئایار، كێشەی یاسایی سەرۆكی ئەنجوومەن ڕەنگە یەكلایی ببێتەوە دواتر دەردەكەوێت دانیشتنەكان دەستپێدەكەنەوە یاخود نا.

 

- ئەو ئەندامەی ئەنجوومەنی پارێزگای نەینەوا ڕوونیشی دەكاتەوە، دەرچوونی فەرمانی سالاری (أمر ولائی) لە دادگای کارگێڕی عێراق، مەبەست لێی وەستاندنی ڕێککارەکانە بۆ ماوەیەکی کاتی تا بڕیاری دادوەری لەسەر دۆسیەکە یەکلایی دەبێتەوە، بەهیچ جۆرێک شەرعیەت بۆ سەرۆکی ئەنجوومەن ناگەڕێنێتەوە.