دیندار زێباری: سەرووی 75%ـی ڕاسپاردەكانی مافی كرێكاران و بیمەی كۆمەڵایەتی كاریان لەسەر كراوە

ئاڤا نیوز

 

ڕێکخەری راسپاردە نێودەوڵەتییەکان لە حكومەتی هەرێمی كوردستان ڕایدەگەیەنێت، بەپێی پلانێكی چوار ساڵەی حكومەتی هەرێمی كوردستان بۆ گرنگیدان بە دۆخی كرێكاران و پاراستنی مافەكانیان، زۆر لە ڕاسپاردە نێودەوڵەتییەكان جێبەجێكراون.

 

وێنە گەورەکە: کرێکاران ماندووترین تووێژی کۆمەڵگەن و حکومەتی هەرێمی کوردستان بەردوام لە هەوڵەی دابینکردنی مافە سەرەتییەکان و داکۆکی کردن بووە لە ماف و شایستە داراییەکانیان لەکاتی کاردنیان، بۆ ئەو مەبەستەش چەندین هەوڵی تایبەتی خستووەتە گەڕ. 

 

لێدوانی فەرمی: د. دیندار زێباری، ڕێکخەری راسپاردە نێودەوڵەتییەکان ڕایگەیاند، بەپێی دوایین ڕاپۆرتی بەراوردکاریی پلانی حکومەتی هەرێمی کوردستان بۆ مافەکانی مرۆڤ، جێبەجێکردنی ڕاسپاردەکانی بواری مافی كاركردن و بیمەی كۆمەڵایەتی کە بەشێکە لە مافە ئابووری و كۆمەڵایەتی و كولتوورییەكان، لە ساڵی 2022 بە ڕێژەی نزیكەی 43% ڕاسپاردەکان بەرەوپێشچوونی بەخۆیەوە بینی و لە ساڵی 2023 بە ڕێژەی 14.3% جێبەجێکراوە. ساڵی ڕابردووش جێبەجێکردنی ڕاسپاردەکانی مافی كاركردن و بیمەی كۆمەڵایەتی لە پرۆسەی جێبەجێکردنی پلانەکە، گەیەندراوەتە سەرووی ڕێژەی 75%.

 
ژمارەکان وادەڵێن: تەنها لە ساڵی 2024 ژمارەی کرێکارانی دەستەبەرکراو گەیشتۆتە (40 هەزار و 767) کرێکار، بە گشتی لە دوای دەستەکاربوونی کابینەی نۆیەمی حکومەتی هەرێم تاکو ئێستا 193 هەزار و 768 كرێكاری بیانی و خۆماڵی و نزیكەی 23 هەزار پرۆژە دەستەبەركراون و 958 كرێكاریش خانەنشین كراون و مانگانە مووچەكانیان وەردەگرن.