عەبادی و عەمار حەکیم  لەبارەی هەڵبژاردن وەڵامی مالیکی دەدەنەوە

ئاڤا نیوز

هەریەک لە حەیدەر عەبادی، سەرۆکوەزیرانی پێشووی عێراق و عەمار حەکیم، سەرەۆکی ڕەوتی حیکمە هەموارکردنەوەی یاسای هەڵبژاردن ڕەتدەکەنەوە و پێیانوایە سوودی نییە.

وێنە گەورەکە: نووری مالیکی، سەرۆکی هاوپەیمانیی دەوڵەتی یاسا پێشنیازی کردووە یاسای هەڵبژاردن هەمواربکرێتەوە، ترسی لە هەڵکشانی هەژموونی ڕەوتی فوراتەین بەسەرۆکایەتی محەممەد شیاع سوودانی هەیە، هەروەها بە هەوڵێکیشی دادەنێت بۆ گەڕانەوەی موقتەدا سەدر بۆ نێو پرۆسەی سیاسی.

بابەتی ستراتیژی: ئەوەی مالیکی زۆر جەختی لەسەر دەکاتەوە، هەڵبژاردن بە شێوازی فرەبازنەیی بکرێت و هەر بەرپرسێکی حکومی ئەگەر نیازی بەشداریکردنی لە هەڵبژاردن هەبێت دەبێت شەش مانگ پێشتر دەست لە کار بکێشێتەوە، ئەم پێشنیازە هەرزوو لەلایەن حەکیم و عەبادییەوە بەبێ سوود لەقەڵەمدرا.

لێدوانی فەرمی: بەها ئەعرەجی، جێگری پێشووی سەرۆکوەزیرانی عێراق دەڵێت، ئەگەر هەیە نووری مالیکی و ڕەوتی سەدر ڕێکبکەون مانگی 12 ئەمساڵ هەڵبژاردنی پێشوەخت بکەن بە سیستەمی فرەبازنەیی، ئەگەر ئەوە ڕووبدات پڕۆژەی زۆر لایەن هەڵدەوەشێنەوە.

بۆچوونی بەرامبەر: عەمار حەکیم، سەرۆکی ڕەوتی حیکمە دەڵێت، هەموارکردنەوەی یاسای هەڵبژاردنەکان بێ سوود دەبێت و دەڵێت، هەر یاسایەکی هەڵبژاردن دەبێت هەماهەنگ بێت لەگەڵ سیستەمی سیاسی نەک بەئارەزووی حیزبەکان بێت.

لەلایەکی دیکەوە: حەیدەر عەبادی، سەرۆکی هاوپەیمانیی نەسر پێیوایە، دەستلەکارکێشانەوەی حکومەت شەش مانگ پێش هەڵبژاردن تێکدانی دیموکراسییە، ڕێگریکردن لە بەرپرسانی حکومی بۆ بەشداریکردن لە هەڵبژاردن دەبێتە هۆی داڕمانی دۆخی دەسەڵاتی جێبەجێکردن.