هەولێر و ورمێ پەرەی زیاتر بە جوڵە بازرگانییەكانی نێوانیان دەدەن

ئاڤا نیوز

لەچوارچێوەی سەردانەكەی بۆ وڵاتی ئێران، ئومێد خۆشناو پارێزگاری هەولێر سەردانی پارێزگای ئازاربایجانی ڕۆژئاوا (ورمێ)ی كرد و لەگەڵ ڕەزا ڕەحمانی، پارێزگار و بەرپرسانی ئەوێ كۆبووەوە و بڕیار درا بە پێكهێنانی لیژنەیەك بۆ چارەسەركردنی گرفتەكانی جوڵەی بازرگانیی نێوانیان.

لێدوانی فەرمی: ئومێد خۆشناو، پارێزگاری هەولێر لە كۆنفڕانسێكی ڕۆژنامەوانیدا ڕایگەیاند: كۆبوونەوەیەكی زۆر گرنگ و بەرهەمدارمان لەگەڵ پارێزگاری ئازاربایجانی ڕۆژئاوا ئەنجامدا.

- لە ڕابردوو چەندین جار كۆبوونەوە و دیداری شاندی هەردوولا هەبووە، چەند ڕێككەوتنێكیشمان هەیە و گەشەپێدانی ئەو ڕێككەوتنانە بووەتە بەشێك لە گەشەپێدانی هەردوو پارێزگا و خزمەتكردن بە جوڵەی بازرگانیی هەردوولا.

- لە كۆبوونەوەی ئەمڕۆ جەختمان لە پابەندبوون بە خاڵەكانی ڕێككەوتنەكانی نێوانمان كردەوە، هەردوولا ئامادەییمان نیشانداوە كە پەرەی زیاتر بە پەیوەندییەكانی نێوانمان بدەین.

- لە ڕابردوودا چەند گرفتێك سەبارەت بە جوڵەی بازرگانی هەبوون و چارەسەرمان كردوون ئەمەش بووەتە هۆی گەشەسەندنی بەرچاوی جوڵەی بازرگانیی لە دەروازەی نێودەوڵەتیی حاجی ئۆمەران - تەمەرچین.

- سەبارەت بەو گرفتانەی ماون و چارەسەر نەكراون، بڕیارمان دا بە پێكهێنانی لیژنەیەكی تەكنیكی بۆ دەستنیشانكردنی خاڵەكانی گرفتەكە و چارەسەركردنیان بە زووترین كات، چەند ڕۆژێكی دیكەش كۆبوونەوەی دیكەمان دەبێت لەگەڵ پارێزگار و تیمی پارێزگاكە.

لەلایەكی دیكەوە: ڕەزا ڕەحمانی، پارێزگاری ئورمیە لە كۆنفرانسێكی ڕۆژنامەوانیدا ڕایگەیاند: پەیوەندییەكانی نێوان هەردوولا لە ئاستێكی باشدایە و لە كۆبوونەوەكەدا گفتوگۆمان كرد سەبارەت بە چۆنیەتی پەرەپێدانی زیاتری پەیوەندیی و جوڵەی بازرگانیی نێوان هەردوولا. هاوكات چارەسەركردنی ئەو گرفتانە كە لە دەروازەی نێودەوڵەتیی هاوبەشی نێوانمان هەیە، لە ڕابردوودا هەماهەنگ و هاوكاری یەكتر بووین و لە داهاتوو زیاتر پەرەی پێدەدەین.