لە خورماڵ گرفت بۆ دابەشکردنی زەوی هەیە

ئاڤا نیوز

لە قەزای خورماڵ گرفتی دابەشکردنی زەوی هەیە بەسەرفەرمانبەران و خانەنشیناندا. شارەوانی قەزاکەش داوا دەکات سەدان دۆنم زەوی دیکەیان پێ بدرێت تاوەکو کێشەکە چارەسەر بکەن.

وێنە گەورەکە: لە قەزای خورماڵ 190 دۆنم زەوی لەکەرتی 25ی یاڵانپێ ئامادەکراوە بۆ دابەشکردن بەسەر فەرمانبەران و خانەنشیناندا. بەڵام 100 دۆنم لەو زەوییانە کراوە بە باخ و زیادەڕۆیی لەسەرە.

زانیاریی تایبەت: هاشم ئەحمەد یەکێکە لەو خاوەن زەوییانە کە 3 دۆنم باخی هەیە و 20 ساڵە کاری تێدا دەکات. نزیکەی 150 جوتیاری تریش خاوەن باخن لەو زەوییانەدا.

چارەسەرەکان: بەشی کشتوکاڵی خورماڵ پێشنیاری ئەو زەوییانەی کردووە، بە بیانووی ئەوەی کە بەردەڵان و بێ کەڵکن، بەڵام خەڵکی ناوچەکە دەڵێن زەوییەکان بەراون و دوو جۆگەی ئاودێرییان لەسەرە، بۆیە بەگومانن لە بڕیارەکە و ڕازی نابن زەوییەکانیان دابەش بکرێت.

ئەوەی پێویستە بیزانیت: نزیکەی هەزار و 300 کەس ناویان هاتووەتەوە بۆ وەرگرتنی زەوی. جگە لەو 120 دۆنمە، شارەوانی خورماڵ داوای 500 دۆنمی دیکەی لە سنووری گوندی ئاوایی ڕۆستەم بەگدا کردووە بخرێتە سەر وەزارەتی شارەوانی.

ئەمەش بزانە: بەپێی ڕێنماییەکان، بۆ هەر دوو دۆنمێک و پارچە زەویەک قەرەبوو دەکرێنەوە، بڕیارەکە ئەو جوتیارانەش دەگرێتەوە کە پەیوەستی کشتوکاڵیان نیە.