سیمکارتی خۆڕایی بە حەجخوازان دەدرێت

ئاڤا نیوز

بەڕێوەبەرایەتی حەج و عومرەی هەرێمی کوردستان ڕایگەیاندووە، هەموو حەجخوازێک سیمکارتێکی خۆڕایی پێ دەدرێت، دەتوانن ئینتەرنێت و پەیوەندی خۆڕایی پێ ئەنجام بدەن.

وێنە گەورەکە: پرۆسەی حەجی ئەمساڵ نزیک بووەتەوە، پێنج هەزار و 190 حەجخواز لە هەرێمی کوردستانەوە بەڕێگای وشکانی و فڕۆکە گەشتی سعوودیە دەکەن بۆ بەجێهێنانی فەریزەی حەج.

لێدوانی فەرمی: کاروان ستوونی، وتەبێژی بەڕێوەبەرایەتی حەج و عومرەی هەرێمی کوردستان بە ئاڤا میدیای ڕاگەیاند، بە هەوڵەکانی شێخ نیاز ڕاغب نەقشبەندی، بەڕێوەبەری گشتیی حەج و عومرەی کوردستان کە هەماهەنگی کرد لەگەڵ دەستەی باڵای حەج و عومرەی عێراق، بڕیاردرا بۆ یەکەمجار خزمەتگوزاریی ئینتەرنێت و پەیوەندی تەلەفۆنی خۆڕایی بۆ حەجخوازان دابین بکرێت. 

کاروان ستوونی ئەمانەشی وت:

٠ لەگەڵ کۆمپانیای کنان کە بریکاری سەرەکی کۆمپانیای STCـی سعوودییە گرێبەست کراوە، هەر حەجخوازێک پێنج گێگا بایت ئینتەرنێت و 120 خولەک پەیوەندی تەلەفۆنی خۆڕایی لە ڕێگای سیمکارتێکەوە بۆ دابین دەکرێت.

٠ بۆ ئەو حەجخوازانەی بە ڕێگای وشکانی دەڕۆن، لە دەروازەی عەرعەر سیمکارتەکەیان پێدەدرێت، بۆ ئەوانەشی بە ڕێگای فڕۆکە دەڕۆن لە فڕۆکەخانەی سعوودیە پێیان دەدرێت، بۆیە پێویست ناکات هیچ حەجخوازێک سیمکارتی سعوودیە بکڕێت.

٠ هەر پاسێکی حەجخوازان تا دەگەنە سعوودیە، ڕاوتەرێکی ئینتەرنێتیان بۆ دادەنرێت و 30 کەس دەتوانێت ئینتەرنێتی لێ وەربگرێت.

ئەوەی پێویستە بیزانیت: بۆ پاڵپشتیی حەجی ئەمساڵ، حكومەتی هەرێمی كوردستان بڕی چوار ملیار و 200 ملیۆن دیناری تەرخان كردووە، ئەمەش بۆ ئەوەی نرخی حەجكردن لەسەر حەجخوازان گران نەبێت و خزمەتی زیاتری حاجییانیش بكرێت لە سعوودیە.