لە كەركووك چەكە بێ مۆڵەتەكان تۆماردەكرێن

ئاڤا نیوز

فەرماندەیی پۆلیسی كەركووك هەڵمەتی تۆماركردنی چەكی بێ مۆڵەتی دەستپێكردووە و پرۆسەكەش بەردەوامە.

چیرۆكی سەرەكی: هۆبەی كۆنتڕۆڵكردن و ڕێكخستنی چەك بەهەماهەنگی لەگەڵ بەشی كاروباری هۆزەكان لە پارێزگای كەركووك، سەردانی دیوەخانی هۆز و خێڵەكانی پارێزگای كەركووك دەكەن، بەمەبەستی كارئاسانی بۆ تۆماركردنی چەكی چەكدارانی سەر بە هۆزەكان بەشێوەی ئەلیكترۆنی.

ئەوەی پێویستە بیزانیت: ئەمینداریەتی گشتیی سەرۆكایەتی ئەنجوومەنی وەزیرانی عێراق پرۆسەیەكی فراوانی دەستپێكردووە بۆ بەدیجیتاڵكردنی سەرجەم داتای هاووڵاتیان بەپێی پێویستی، لەڕێگەی ماڵپەڕی ئەلیكترۆنی 'بوابە ئور' كە مەبەست لێی یەكخستنی داتاكان و هاوتاكردنییەتی لەپێناو بەدەستگەیشتنی زانیاریی پێویست لەبارەی هاووڵاتیان، تۆماركردنی سەرجەم چەك و كەرەستە سەربازییەكان بەهەمان شێوە لەڕێگەی ئەم ئەپەوە دەبێت.

ڕاگەیێنراوی فەرمی: فەرماندەیی پۆلیسی كەركووك لە ڕاگەیێنراوێکدا ڕایگەیاند: پاڵپشت بە یاسای چەك ژمارە 51ـی ساڵی 2017، مەبەستمانە دەست بەسەر چەكە بێ مۆڵەتەكاندا بگرین، هاوكات ئەوانەشی لەبەر هەر جۆرە كار و ئەركێك بێت، چەكیان هەڵگرتووە، مۆڵەتیان پێ بدەین و ژمارە و جۆری چەكەكانیان تۆمار بکەین.

بۆچی گرنگە: بەپێی بەدواداچوونەكانی وەزارەتی ناوخۆی عێراق، چەكی بێ مۆڵەت هۆكاری سەرەكی زیادبوونی تاوان و گرژییەكانە بەتایبەت لە ناكۆكی و شەڕی عەشائیری و زیادبوونی توندڕەویی و دیاردەی چەكداری.