سەنتەری میترۆ: ڕەنگە ڕۆژنامەنووسان بەهۆی ژیریی دەستکرد کرێی کارکردنیان لەدەست بدەن

ئاڤا نیوز

 

بەڕێوەبەری سەنتەری میترۆ بۆ داكۆكیكردن لە مافی ڕۆژنامەنووسان هۆشداری دەداتە میدیاكان و دەڵێ ژیریی دەستكرد وێڕای سوودەكانی، زیانیشی بۆ كاری ڕۆژنامەنووسی هەیە.

 

وێنە گەورەكە: ئەمڕۆ ڕۆژی جیهانیی ئازادیی ڕۆژنامەنووسانە كە لەلایەن ڕێكخراوی یونسكۆوە دەستنیشان كراوە لەم ڕۆژەدا ڕێكخراو و كۆمەڵە و سەندیكاكانی تایبەت بە كاری ڕۆژنامەوانی قسەی خۆیان دەبێت.

 

لێدوانی فەرمی: دیاری  محەممەد، بەڕێوەبەری سەنتەری میترۆ لە كۆنفڕانسێكی ڕۆژنامەوانیدا كە بەبۆنەی ڕۆژی جیهانیی ئازادیی ڕۆژنامەنووسان ڕێكخرابوو، ڕایگەیاند: كاریگەرییەكانی ژیریی دەستكرد بەسەر كاری ڕۆژنامەوانی ترسناكە، سوودی زۆرە بەڵام مەترسیی لەسەر كار و پیشەی ڕۆژنامەوانی هەیە و ڕەنگە بەشێك لە ڕۆژنامەنووسان بەو هۆیەوە كرێی كاركردن یان بەشێك لە كرێی كاركردنیان لەدەست بدەن.

 

زانیاریی زیاتر: بەشێك لە میدیاكانی هەرێمی كوردستان ژیریی دەستكرد بۆ كاری ڕۆژنامەوانی بەكاردەهێنن. هاوکات بەپێی گوتەی بەڕێوەبەری سەنتەری میترۆ بەشێك لە میدیاكان لە هەرێمی كوردستان لەڕێگەی ژیریی دەستكردەوە هەواڵ و زانیاریی نادروستیان بە خەڵك داوە، هۆشداریش دەدات بە میدیاكان كە وریاییەوە مامەڵە لەگەڵ ژیریی دەستكرد بكەن.