دەست بەسەر 10 هەزار دەنکە حەبی ترامادۆڵ گیرا

ئاڤا نیوز

ئاسایشی هەولێر تۆمەتبارێک دەستگیر دەکات کە بەنیاز بووە بازرگانی بە جۆرێکی قەدەغەکراوی حەبەوە بکات کە حەبی ماددەی هۆشبەرە و بەپێی ڕێنمای پزیشکی ڕێگە پێدراو نیە هیچ کەسێک بەکاریبهێنێت. هاوکات دەستی بەسەر 10 هەزار دەنکە حەبی ترامادۆڵدا گرت.

وێنە گەورەکە: لە چەند ساڵی ڕابردوودا بەکارهێنان و بازرگانیکردن بە ماددە هۆشبەرەکان لە هەرێمی کوردستان بەشێوەیەکی بەرچاو ڕوو لە زیادبوونە، بەردوام هەواڵی دەستگیرکردنی بەکارهێنەران و بازرگانان بە چەندین شێوە و لە چەندین شوێنی جیاواز ڕادەگەیێنرێت.

ڕاگەیێنراوی فەرمی: ئاسایشی هەولێر لە ڕاگەیێنراوێکدا ئاماژە بەوە دەدات، تۆمەتبار (گ، م، م) دەستگیرکرا، لەکاتی دەستگیر کردنیدا دەستگیرا بەسەر 10 هەزار دەنکە حەبی هۆشبەر لە جۆری (ترامادۆڵ) کە بەنیازبووە بازرگانی پێوە بکات لە ناو شاری هەولێر.

لەلایەکی دیکەوە: هەر ئەمڕۆ ئەنجوومەنی ئاسایشی هەرێمی کوردستان ڕایگەیاند، دامەزراوەی ئەنجوومەنی ئاسایشی هەرێمی کوردستان، دەیان کەسی بە تۆمەتی فرۆشتنی ماددەی هۆشبەر دەستگیرکردووە کە لەنێو دەستگیرکراوەکاندا ژمارەیەک بازرگانی بیانی و نێودەوڵەتی هەیە.