لە مەراسیمی ڕێزگرتن لە تەرمی سورەیا ئۆندەر هێرش دەکرێتە سەر سەرۆکی جەهەپە

ئاڤا نیوز

 

ئۆزگور ئۆزێل، سەرۆکی جەهەپە لە کاتی بەشداریکردن لە مەراسیمی ڕێزگرتن لە تەرمی سری سورەیا ئۆندەر، بە بۆکس هێرشی کرایە سەر و دواتر هێرشکارەکە ڕاستەوخۆ لەلایەن پۆلیسەوە دەستگیرکرا.

 

چیرۆکی سەرەکی: لە کاتی کۆتاییهاتنی مەراسیمی ڕێزگرتن لە تەرمی سری سورەیان ئۆندەر، لەبەردەم سەنتەری کولتووری ئەتاتورک، دوای ئەوەی کەسێک بە دەنگی بەرز دەڵێت، "من نەوەی عوسمانیم" بە بۆکس هێرش دەکاتە سەر ئۆزگور ئۆزێل، سەرۆکی جەهەپە. ڕووداوەکە کاردانەوەی سەرجەم لایەنە سیاسیەکانی تورکیای لێکەوتەوە. 

 

ئەوەی پێویستە بیزانیت: هێرشکارەکە کە ناوی سەلچوک تێنجیئۆغڵوە و تەمەنی 66 ساڵە، ڕاستەوخۆ لە شوێنی ڕووداوەکە دەستگیرکرا. دوای لێكۆڵینەوە دەرکەوتووە تاوانبارەکە پێشینەی تاوانی هەیە. زانیارییەکان دەریدەخەن لە ساڵی 2004، دوو منداڵی خۆی کوشتووە لەکاتێکدا لە ژوورەکانیان خەوتبوون.  

 

کاردانەوەکان: ڕەجەب تەیب ئەردۆغان، سەرۆککۆماری تورکیا ڕاستەوخۆ دوای ڕووداوەکە پەیوەندی بە ئۆزێلەوە کرد و هیوای سەلامەتی بۆ خواست و پێی ڕاگەیاند،" بە وردی بەداوداچوون بۆ لێکۆڵینەوەکان دەکەم".

 

هەر دوای ڕووداوەکە، دەم پارتی سەرکۆنەی ئەو هێرشەی کرد و ڕایگەیاند، "نەفرەت لەم جۆرە کردەوانە دەکەین و هیوای سەلامەتی بۆ ئۆزگور دەخوازین".