یاریگای "فرەنسۆ هەریری" نۆژەندەکرێتەوە و چیمەنەکەی دەکرێتە هایبرێد

ئاڤا نیوز

 

پارێزگاری هەولێر ڕایدەگەیێنێ، سەرەتای مانگی شەش یاریگای نێودەوڵەتیی "شەهید فرەنسۆ هەریری" نۆژەن دەکرێتەوە و چیمەنەکەی هاوشێوەی یاریگا جیهانییەکانی لێدەکرێت.

 

وێنە گەورەکە: یانەی هەولێر لە ساڵی 1968 دامەزراوە و لەگەڵ دروستبوونی یانەکە، یاریگاکەی دروستکرا. کۆتایی ساڵی 2001 یاریگاکە ناوی گۆڕدرا بۆ "شەهید فرەنسۆ هەریری" و دەگوترێت دووەم گەورەترین یاریگای ئاستی عێراقە.

 

لێدوانی فەرمی: ئومێد خۆشناو، پارێزگاری هەولێر بە ئاڤا میدیای ڕاگەیاند، بڕیاری نۆژەنکردنەوەی یاریگاکە بە فەرمان و ڕەزامەندی مەسرور بارزانی، سەرۆکوەزیرانی کوردستان بووە. ملیارێک و 900 ملیۆن دیناری بۆ تەرخانکراوە و سەرەتای مانگی شەش نۆژەنکردنەوەکە دەستپێدەکات. بۆیە ئەو کاتە دیاری کراوە، چونکە خولى ئەستێرەکانى عێراق کۆتایی دێت.

 

بەگوتەی پارێزگاری هەولێر نۆژەنکردنەوەکە چیمەن و تراکى یاریگاکە (ئەو ڕووبەرەی لە قەراغی چیمەنی یاریگایە) دەگرێتەوە.

 

لەبارەی جۆری چیمەنی یاریگاکە، بەگوتەی ئومێد خۆشناو "بۆ جۆرى (هایبرێد) دەگۆڕدرێت کە زۆربەى یاریگا گەورە و جیهانییەکان بەو چیمەنە فەرشکراون".