ئەو کەسانەی لە تۆڕە کۆمەڵایەتییەکانەوە بانگەشەی جادوو و فاڵ دەکەن دەستگیر دەکرێن

ئاڤا نیوز

کەسانێک لە ڕێی تۆڕە کۆمەڵایەتییەکانەوە بانگەشەی فاڵ و جادوو دەکەن و پارە بە فێڵ لە خەڵک وەردەگرن، ئاسایشی هەولێریش لەوبارەیەوە دەڵێت 'ئەکاونتەکانیان دەسوتێنین و دەستگیریان دەکەین'.

چیرۆکی سەرەکی: لە تۆڕی کۆمەڵایەتی فەیسبووک، سناپ چات، ئینستاگرام، چەندین ئەکاونت لە ژێر ناوی جۆراوجۆر بۆ کاری جادوو و فاڵ دروستکراون، بانگەشەی ئەوە دەکەن کە بە گەرەنتی 100% کار دەکەن، داوای وێنە و ڤیدیۆی کەسەکە و کەسوکاری دەکەن.

لێدوانی فەرمی:  وتەبێژی ئاسایشی هەولێر، بە ئاڤا میدیای ڕاگەیاند:

٠ شێخ شاباز، شێخ پۆڵا، دوو جادووگەری بەناوبانگی سلێمانی لە ساڵی 2024 دەستگیرکران و سزادران، ئەوانە چەندین کاری نەشیاو و دەستدرێژیان بۆ سەر ئافرەتان ئەنجامدابوو، هەروەها چەندین وێنە و ڤیدیۆی نەشیاویان لابوو.

٠ چەندین ئەکاونتمان لە تۆڕە کۆمەڵایەتییەکان سوتاندووە، کە بانگەشەی جادوو و فاڵگرتنەوەیان دەکرد، ئەگەر دادوەری لێکۆڵینەوە فەرمانی دەستگیرکردن بۆ ئەو کەسانە دەربکات، ئێمە فەرمانەکە جێبەجێ دەکەین.

٠ ئەو کەسانە لە ڕێی تۆڕە کۆمەڵایەتییەکانەوە، داوای وێنەی ژن یان پیاو و کەسوکاریان دەکەن، دوای تێپەڕێنی ماوەیەک، بە بیانووی نووسین لەسەر جەستەیان ڤیدیۆیان پێدەکەنەوە و بە ڕووتی ڤیدیۆیان تۆمار دەکەن، ئیدی بەو ڤیدیۆ و وێنانە هەڕەشەیان لێدەکەن  پارەیان لێ وەردەگرن.

٠ قوربانییەکان زۆرینەیان ژنن و پیاویشیان تێدایە.

٠ ئەو هەڵمەتانەی بۆ دەستگیرکردنی فاڵچی و جادووگەرەکان کردمان، دواتر بە بەڵگە کارەکانیانمان بۆ خەڵک خستەڕوو، کاریگەری ئەرێنی لەسەر خەڵک هەبووە.

٠ دەبێت داواکاری گشتیی دۆسیەکان بجووڵێنێت.

دروستکردنی ئەکاونتی فەیک بەناوی فاڵ و جادوو بووەتە سەرچاوەی پارە پەیداکردن بۆ خەڵکانێک، پێویستە هاووڵاتیان وشیار بن.