ئەو ژن و مێردە سواڵکەرەی فێڵیان لە هاووڵاتیان دەکرد دەستگیر کران

ئاڤا نیوز

پۆلیسی هەولێر ژن و مێردێكی سواڵكەر دەستگیر دەكات، كە سەرەڕای گوزەرانی باشی ژیانیان، بە فێڵ پارەیەكی زۆریان لە خەڵك وەرگرتبوو.

چیرۆكی سەرەكی: ژن و مێردێك ڕۆژانە بە ئۆتۆمبێلی مۆدێل بەرزەوە لە خانووێكی شاهانە دەهاتنە دەرەوە و لە شوێنە گشتییەكان و بەنزینخانەكان وەك سواڵكەر داوای هاوكاری و كۆمەكیان لە هاووڵاتیان دەكرد، گوایە كەمدەرامەتن و لە ڕێگە ماونەتەوە و پارەی گەڕانەوەیان نەماوە، خەڵكیش كە بەمجۆرە دەیانبینن، كۆمەكیان دەكردن، وەك خۆیان دەڵێن، "ڕۆژانە حەفتا تاوەكو 100 هەزار دیناریان لەو فێڵ و تەڵەكەبازییە دەستدەكەوت."

چی ڕوویدا: پۆلیس سەرنجی ئەو دوو تۆمەتبارەی دا، دوای بەدواداچوونی ورد، بۆی دەركەوت ئەمە فێڵی ڕۆژێك و دوو ڕۆژیان نییە بەڵكو ماوەیەكی زۆرە لەسەر ئەو كارە ڕاهاتوون.

لێدوانی فەرمی: نەقیب كارزان ساڵح، وتەبێژی پۆلیسی هەولێر تایبەت بە ئاڤا ڕایگەیاند، دوای كۆكردنەوەی بەڵگەی پێویست لەسەر ئەو ژن و مێردە، كە بەناوی سواڵكردنەوە فێڵیان لە خەڵك دەكرد، لەسەر فەرمانی دادوەری لێكۆڵینەوە، پۆلیس قۆڵبەستیان دەكات و ڕادەستی دادگایان دەكات.

داواکاری فەرمی: وتەبێژی پۆلیسی هەولێر لەڕێی ئاڤاوە داوا لە هاووڵاتیان دەكات، بەهیچ شێوەیەك نەكەونە ژێر كاریگەری هەست و سۆزی ئەوجۆرە كەسە فێڵزان و تەڵەكەبازانە، بەو پێیەی دوای بەدواداچوون بۆیان دەركەوتووە دۆخی ژیانیان لە زۆربەی خەڵك باشتر و شیاوترە.