کۆتاییهاتنی پرۆسە سەربازییەکان لە نزیک بەنداوی تشرین ڕادەگەیێنرێت

ئاڤا نیوز

ئیدارەی خۆسەری ڕۆژئاوای کوردستان دەڵێت، دوای چوار مانگ لە شەڕ و پێکدادان، پرۆسە سەربازییەکان لە نزیک بەنداوی تشرین کۆتاییانهات و ئیرادەی خۆڕاگریی گەل و پێکهاتەکانی باکوور و ڕۆژهەڵاتی سووریا سەرکەوتنی بەدەستهێنا.

چیرۆکی سەرەکی: لەگەڵ ڕوخانی دەسەڵاتی ئەسەد لە سووریا، هێزەکانی نزیک لە تورکیا هێرشەکانیان بۆ کۆنترۆڵکردنی چەند ناوچەیەکی ژێر دەسەڵاتی هەسەدە دەستپێکرد، بەڵام هێرشەکان لە بەنداوی تشرین وەستان کە دەکەوێتە نێوان کۆبانێی و مەنبج، بەرگریی هەسەدە پێشڕەوییەکانی ڕاگرت، ماوەی چەند هەفتەیەکیشە ڕێککەوتنێکی ڕانەگەیێنراو بۆ ڕاگرتنی هەموو گرژییەکان چووەتە بواری جێبەجێکردنەوە.

ڕاگەیێنراوی فەرمی: ئیدارەی خۆسەری ڕۆژئاوای کوردستان لە ڕاگەیێنراوێکدا ئاماژەی بەوەکردووە، هێرشەکانی سەر بەنداوی تشرین مەترسی لەسەر ئاو و دابینکردنی کارەبا بۆ ملیۆنان کەس دروستکردبوو، بەڵام خەڵک و پێکهاتەکانی باکوور و ڕۆژهەڵاتی سووریا دژی ئەو پیلانە وەستانەوە.

- خەڵک کە پاڵپشتی هەسەدە بوون، سەلماندییان ژیانێک بەبێ شکۆ و ئازادی قبووڵ ناکەن، "ئەو خۆڕاگرییەش لە مێژووی شۆڕش و خۆڕاگریی گەلەکەماندا دەنوسرێتەوە".

- "شانازیی بە شەهیدەکانمان دەکەین و هیوای چاکبوونەوەش بۆ بریندارەکان دەخوازین".

- "ئەمڕۆ کۆتاییهاتنی پرۆسە سەربازییەکان ڕادەگەیێنین، بەڵام بەرخۆدان بۆ ڕووبەڕووبوونەوەی هەر مەترسییەک بەردەوام دەبێت".