لە کەرکووک بەهۆی خۆڵبارینەوە 100 کەس ڕەوانەی نەخۆشخانە دەکرێن

ئاڤا نیوز

شەپۆلێکی چڕی خۆڵبارین زۆربەی پارێزگاکانی عێراق و  هەرێمی کوردستانی گرتووەتەوە، تەنیا لە کەرکووک تا ئێستا 100 کەس گەیێنراونەتە نەخۆشخانەکان.

وێنە گەورەکە: شەپۆلێکی چڕی خۆڵبارین زۆربەی پارێزگاکانی باشوور و ناوەڕاستی عێراقی گرتووەتەوە، پێشتریش دەستەی گشتیی کەشناسی و چاودێریی بوومەلەرزەزانیش هۆشداری لە هاتنی ئەو شەپۆلە دابوو. هاوکات عێراق یه‌كێكه‌ له‌و وڵاتانه‌ی کە زۆرترین زیانی گۆڕانکاریی کەشوهەوای بەرکەوتووە، بەو هۆیەشەوە ساڵانە خۆڵبارینی چڕ ڕوو لە زۆربه‌ی پارێزگاکانی ناوەڕاست و باشوور دەکات.

لێدوانی فەرمی: ئارجان محەممەد، بەڕێوەبەری گشتیی تەندروستی کەرکووک، بە ئاڤا میدیای ڕاگەیاند، پارێزگای کەرکووک وەکو ناوچەکانی دیکەی عێراق دووچاری خۆڵبارین بووەتەوە، بەهۆی خۆڵبارینی ئەمڕۆ 100 کەس سەردانی نەخۆشخانەیان کردووە و دووچاری تەنگەنەفەسی بوونە و چارەسەری پێویست وەردەگرن.

لەلایەکی دیکەوە: سەبارەت بە نەخۆشی تای خوێنبەربوون، بەڕێوەبەری گشتیی تەندروستی کەرکووک، دەڵێت، حاڵەتەکانی تووشبوون لەئێستادا لە کەرکووک بووەتە سفر، ڕێکاری پێویست گیراوەتەبەر ڕەوشەکە لە ژێر کۆنترۆلە.

ئەوەی پێویستە بیزانیت: پێشتر عامر جابری، وتەبێژی دەستەی گشتیی کەشناسی و چاودێریی بومەلەرزەی عێراق هۆکاری ئەم شەپۆلە خۆڵبارینەی بۆ ئاڤا میدیا ئاشکرا کردبوو، ئاماژەی بەوەدابوو، خۆڵبارین تاوەکو کۆتایی مانگی ئابی داهاتوو بەردەوام بێت.