لە سەرجەم پارێزگا و ئیدارە سەربەخۆکان بەشێک لە شارەوانییەکان لە گەندەڵییەک تێودەگلێن

ئاڤا نیوز


لە سەرجەم پارێزگا و ئیدارە سەربەخۆکانی هەرێمی کوردستان بەشێک لە شارەوانییەکان لە گەندەڵی تێوەگلان، لیژنەی لێکۆڵینەوە پێکهێنراوە و لێکۆڵینەوەی ورد دەکرێت.

وێنە گەورەکە: گەندەڵییەکە چاوپۆشیکردنە لە زێدەڕۆیی بۆ سەر موڵکی گشتی بەتایبەت لە دەوروبەری شارە گەورەكان و زەوییە كشتوكاڵییەكانی نێو حەرەمی گوندەكان، لە سەرتاسەری هەرێمی کوردستانیش کراوە.

هۆکارە زانراوەکان: هۆکاری زیادبوونی زێدەڕۆییەکان بۆ كەمتەرخەمی بەشی مۆڵەتی بیناكردنی نێو شارەوانییەكان دەگەڕێنرێتەوە، بەتایبەت فەرمانبەرانی پەیوەست بەم ئەرکە. فەرمانبەرەکان بەپێی ئەو ئەركەی یاسا پابەندی كردوون، دەبێت ڕێگربن لە زێدەڕۆییكردن لەسەر موڵك و ماڵی گشتی، بەڵام ڕێگرییان نەكردووە لەو زێدەڕۆییانەی كراون و خۆیان بێدەنگ کردووە. یاخود پێچەوانەی یاسا و ڕێنماییەكان، بەهیچ شێوەیەك سەرووی خۆیان ئاگادار نەکردووەتەوە لە بوونی ئەو زێدەڕۆییانە.

زانیاریی تایبەت: ئاڤا زانیویەتی فەرمانگەی داواكاریی گشتی لە سەرجەم پارێزگا و ئیدارە سەربەخۆكان، سەرۆكایەتیی شارەوانییەكان و دەزگا ئەمنییە پەیوەندیدارەكانی ڕاسپاردووە، لیستی ناوی ئەو فەرمانبەرانە بدەن كە سەلمێنراوە كەمتەرخەم بوونە لە بەجێگەیاندنی ئەركەكانیان، بەتایبەتی لە بێدەنگبوونیان لە كەیسی زێدەڕۆیی، هاوكات زانیاریی ورد و ناونیشانی وەزیفی ئەو فەرمانبەرانە داواكراوە.

هەنگاوی داهاتوو: پاڵپشت بە ماددەی 240 لە یاسای سزادانی عێراقی، كەیسی ئەو فەرمانبەرانە دەدرێتە دادگای لێكۆڵینەوەی تایبەتمەند بەپێی شوێنی جوگرافی هەر فەرمانبەرێك. ئەگەر لەسەریان ساغبێتەوە كە دەستیان هەبووە لە زێدەڕۆیی، یان بەرتیل و پارەیان لە سەرپێچیکاران وەرگرتووە بۆیە قسەیان نەکردووە، یاخود بەهەر هۆكارێك ئەركی سەرشانیان جێبەجێ نەكردووە، ئەوا جگەلەوەی بەیەكجاری لە ئەرکەکەیان دەردەکرێن، تووندترین سزای داراییش دەدرێن.

باکگراوند: لەماوەی ڕابردوودا لەسەر هەمان هۆكار، ژمارەیەك موختاری گوندەكان و بەرپرسی کارگێڕیی ناحییەكان، بەتۆمەتی بێدەنگبوونیان لەسەر دیاردەی زێدەڕۆیی لەسەر موڵك و ماڵی گشتی بەتایبەت زێدەڕۆیی لەسەر زەویی كشتوكاڵی، دراونەتە دادگای لێكۆڵینەوەی دەستپاكی لە هەرێمی كوردستان.