لە دهۆک کۆمپانیایەک مایەپووچ دەبێت و پرۆژەیەکی نیشتەجێبوون بە نیوەچڵی جێدەهێڵێت

ئاڤا نیوز

لە پارێزگای دهۆک کۆمپانیایەک پێش تەواوکردنی پڕۆژەکی نیشتەجێبوون، مایەپووچ دەبێت و پرۆژەکە بەنیوەچڵی جێدەهێڵێت. ئەو هاووڵاتیانەی کە شوقەیان لە پرۆژەکە کڕی بوو، گردبوونەوە و داوای مافی خۆیان دەکەن.

وێنە گەورەکە: لە قەزای سێمێلی پارێزگای دهۆک پرۆژەیەکی نیشتەجێبوون پێش ئەوەی شوقەکان تەواو بکات و ڕادەستی خاوەنەکانیان بکات کە شوقەیان لە پرۆژەکە کڕیوە، کۆمپانیاکە مایەپووچ دەبێت و واز لە پرۆژەکە دەهێنێت. ئێستا پرۆژەکە بەنیوەچڵی جێهێڵدراوە.

چیرۆکی سەرەکی: ئەمرۆ ئەو هاوڵاتیانەی شوقەیان لە پرۆژەکە کڕیوە گردبوونەوە. دەڵێن کۆمپانیاکەش نەماوە و دەمێکە ئیفلاسی کردووە، "نازانین ڕووبکەینە کوێ و بێزاربووین لە چاوەڕوانی".

ئەوەی پێویستە بیزانیت: پرۆژەکە دەکەوێتە نێوان ڕێگای سێمێڵ و خانکێ. 

لێدوانی فەرمی: د. هەڤاڵ سەدیق، بەڕێوەبەری وەبەرهێنانی دهۆک دەڵێ: تەنیا ئەو پڕۆژەیە نییە کە کێشەی تەواو نەکردنی هەبێت، بەڵکو کۆمەڵێک پرۆژەن.

- لیژنەیەکمان پێکهێناوە و کێشەی هەموویان چارەسەرکراوە و تەنیا ئەو پرۆژەیە نەبێت، هێشتان ماوە چارەسەر بکرێت.

- ئێستا خەریکی چارەسەرکردنی ئەوپرۆژەیەین و خاوەن شوقەکانیش دڵنیا دەکەینەوە کە کێشەکەیان چارەسەر دەبێت.