فایلی خەڵک؛ دوو گوندی سنووری ناحیەی کەسنەزان کێشەی ڕێگەی هاتووچۆیان هەیە

ئاڤا نیوز

دانیشتوانی گوندەکانی هەردوو باخچەی گەورە و بچووک لە ناحیەی کەسنەزان، بەدەست کێشەی نەبوونی قوتابخانە و خراپی ڕێگاوبان دەناڵێنن و بەڕێوەبەری ناحیەکەش دەڵێت با واژۆ کۆبکەنەوە و پاڵپشتیان دەبین.

چیرۆکی سەرەکی: گوندەکانی باخچەی بچووک و گەورە لە سنووری ناحیەی کەسنەزانی هەولێر گرفتی خراپی شەقامێکی پێنج کیلۆمەتریان هەیە و داوای نۆژەنکردنەوەی دەکەن.

لێدوانی فەرمی: ئاسۆ ئیسماعیل دانیشتوێکی گوندی باخچەی گەورەیە بە ئاڤا میدیای وت: ئەو شەقامە پێویستی بە نۆژەنکردنەوە هەیە، لەبەر ئەوەی کێشە بۆ ئۆتۆمبێلەکانمان دروست دەکات و  دەبێت مانگی جارێک بۆ دوو جار بچین بۆ لای فیتەر، چونکە شەقامەکە هەمووی چاڵە و بەکەڵک نەماوە.

زانیاریی زیاتر: دانیشتوانی گوندەکانی باخچەی بچووک و گەورە گرفتی دیکەشیان زۆرە وەک نەبوونی قوتابخانەی ئامادەیی کە قوتابیانی کوڕ و کچ بە ناچاری و بە مانتۆڕ ڕێگایەکی دوور دەبڕن تاوەکو دەگەن بە قوتابخانە، بەهۆی بێ قوتابخانەیشەوە لەدوای شەشی سەرەتایی زۆرێک لە دایکان و باوکان کچەکانیان لە خوێندن دەرهێناوە. سەرەڕای ئەوەی ئەو قوتابخانە بنەڕەتیەی هەیانە بە جەمەلۆن دروست کراوە.

لەلایەکی دیکەوە: گوندەکان جگە لە نەبوونی قوتابخانە، و خراپی شەقام، و نەبوونی شەبەکەی مۆبایل، ڕۆژانە تەنها 8 کاتژمێر کارەبای نیشتمانیان هەیە، چونکە مۆلیدەیان نییە، ئەمە جگە لە نەبوونی بنکەی تەندروستی.

بۆچوونی لایەنی بەرامبەر: هیشام سەعید، پەیامنێری ئاڤا پەیوەندی بە سایب هاڕون، بەڕێوەبەری ناحیەی کەسنەزان کردووە، دەڵێت: هەرچی شەقامەکەیە هەموو ڕێکارەکان تەواو بووە تەنیا بودجەی ماوە بۆی تەرخان بکرێت. سەبارەت بە داواکارییەکانی دیکەشیان با نووسراوێک بکەن و واژۆ کۆبکەنەوە، ئێمەش وەک بەڕێوەبەرایەتی ناحیە پاڵپشتیان دەکەین بۆ چارەسەرکردنی کێشەکانیان و دەنگیان بەسەرووی خۆمان دەگەیەنین.