وتەبێژی وەزارەتی کارەبا: وێستگەی بەرهەمهێنانی کارەبای دووکان کوژێندراوەتەوە

ئاڤا نیوز

 

وەزارەتی کارەبای حکومەتی هەرێمی کوردستان بەهۆی دابەزینی ئاستی ئاو لە بەنداوی دووکان، وێستگەی بەرهەمهێنانی کارەبا لەو بەنداوە دەکوژێنێتەوە. وتەبێژی وەزارەتەکەش دەڵێت، ئەم کوژاندنەوەیە کاریگەری لەسەر دابەزینی ڤۆڵتی کارەبا دەبێت.

 

وێنە گەورەکە: بەنداوی دووکان کە گەورەترین بەنداوی هەرێمی کوردستانە و دەکەوێتە پارێزگای سلێمانییەوە، بەهۆی ئەوەی لە ساڵانی ڕابردوودا بەشێک لەو سەرچاوە ئاویانەی لە ڕۆژهەڵاتی کوردستانەوە دەڕژێنە ناو بەنداوەکە لەلایەن ئێرانەوە وشک کران، بەشێوەیەکی بەرچاو ئاستی ئاوی دابەزیوە.

 

لێدوانی فەرمی: ئومێد ئەحمەد، وتەبێژی وەزارەتی کارەبای حکومەتی هەرێمی کوردستان بە ئاڤا ڕاگەیاند: لە ماوەی 25 ساڵی ڕابردوودا ئاستی ئاوی بەنداوی دووکان وەک ئێستا دانەبەزیوە، بەنداوەکە لە توانایدا کە 6.8 ملیار مەتر سێجا ئاو کۆبکاتەوە بەڵام ئێستا 1.7 ملیار مەتر سێجا ئاوی تێدایە، هەر بۆیە تۆڕباینەکانی بەرهەمهێنانی کارەبا کوژێندراونەتەوە، چونکە ئێستا ئاوی پێویست بۆ بەرهەمهێنانی کارەبا بەر نادرێتەوە. 

 

- کوژاندنەوەی وێستگەی بەرهەمهێنانی کارەبای بەنداوی دووکان، کاریگەری دەبێت لەسەر دابەزینی ڤۆڵتی کارەبا لە چەند ناوچەیەک.